بعد مرور عشر أيام من رمضان, نقدر نقول الكنز في “الرحلة” بقلب

لما بتيجي تقيم عمل فني جيد بتشوفه بأكثر من زاوية؛ سيناريو, إخراج, تصوير, تمثيل, مونتاج و غيره.. و لما تمسك حاجة حاجة لوحدها ممكن تتطلع فيها عيوب, بس و هما متضفرين مع بعض في الاخر ممكن تتجاوز المشاكل دي كمتفرج. بس لو في عمل قادر تحلل كل حاجه لوحدها او مع بعض و في الحالتين بيكون منتج فني “عبقري” و “متفرد” و “مميز”…. يبقي الاجابه في الرحلة.

الرحلة مسلسل للمخرج حسام علي, مخرج ال36 سنه بإمكانيات و موهبة أسماء كانت بدايتهم في الإخراج من 20 و 30 سنة. القصة و الشخصيات في الرحلة معقدين, بالرغم من ده المشاهد قادر يعيش معاهم كل الصراعات من غير ما يفوته أي تفاصيل. مسلسل الرحلة بيخليني متشوقة و مستمتعة من هنا لرمضان اللي بعد اللي جاي, من الأخر, مش محسسني اني كمتفرجة غبيه او عقليتي مش هتستوعب اللي بيحصل.

حسام علي قدم اعمال اخرها مسلسل 30 يوم و الرحلة اللي بيتعرض حاليا, من بطولة باسل خياط, ريهام عبدالغفور و وليد فواز وحضرة الممثلة حنان مطاوع, كمان مره حضرة الممثلة حنان مطاوع اللي اثبتت موهبتها بشدة في رمضان اللي فات في مسلسلين من افضل اللي اتقدم. الأربع وجوه اللي في العمل مبدعين و مختلفين و ممثلين بكل معني للكلمة دي و اهميتها.

33196289_587404091625084_6608249540757684224_n

باسل خياط و ريهام عبدالغفور بيقدموا شخصيتين شوفنا الي حد ما شبهم في فيلم Split  و Room, الراجل اللي بيعاني من اضرابات نفسية حاده بتخليه جواه اكتر من شخصية, و الست اللي اتحبست 6 سنين مع مختل عقليا و معاها طفل هو السبب انها عايزة تكمل الحياه و تهرب,  و انا منحازة و بقوة للرحلة و بقول ان ممثلينا مفيش أحسن منهم معلش يعني…

بالتة الألوان قصة تانيه لوحدها, استخدام الدرجات الغامقة و بالتحديد الاصفر بدرجاته و البني بيخليني اتفرج و أنا مندمجة و متوترة طول الوقت, طول الوقت (اللي بيتفرج هيفهم كررتها ليه)

32783349_585758165123010_7765544069396168704_n

المسلسل ده قصته مش هتخلص بالنسبالي بمجرد ما اشوف الحلقة ال30, عارفه انه هيفضل مرجع فني مكمل معايا, و لحد ما اقدر اطبق اللي اتعلمته من دراستي للاخراج, هفضل مبسوطة ان الدراسة دي مخلياني افهم قيمة عمل زي ده….. و الكنز في الرحلة.

 

Comments