دور الـ١٦ من دوري أبطال أوروبا

انطلقت امبارح فعاليات دور ال١٦ من دوري ابطال اوروبا دور الذهاب بمباراة يوڤنتوس وتوتنهام واللي انتهت بالتعادل 2-2 على ملعب اليوڤي في مباراة كانت تليق بالفريقين واللي ابتدى فيها يوڤنتوس بالتسجيل في الدقيقة التانية عن طريق هيجواين وسجل نفس اللاعب الهدف التاني في الدقيقة التامنة ولكن توتنهام عاد للمباراة عن طريق هاري كين في الدقيقة 35 وسجل هدف التعادل في الدقيقة 70 لتنتهي المباراة بالتعادل في انتظار مباراة العودة.
المباراة التانية كانت بين مانشستر سيتي وبازل واللي محضرش فيها بازل على الاطلاق وانتهت بفوز كبير للمان سيتي ب 4 اهداف مقابل لاشئ.

هتُستكمل مباريات دور ال١٦ اليوم بمباراتي ريال مدريد وباريس سان چيرمان اللي هتكون نتيجتها صعبة التوقع لأن الفريقين قدموا أداء جيد جداً في دور المجموعات بخلاف ان باريس سان چيرمان كان أول مجموعته وريال مدريد احتل المركز التاني في مجموعته.

المباراة التانية واللي معظمنا مهتم بيها كمصريين بنحب نشجع صلاح في أي بطولة هتكون بين ليڤربول وبورتو.. ليڤربول تأهل من مجموعته كأول بواقع ٣ انتصارات و٣ تعادلات بينما احتل بورتو المركز التاني في مجموعته.
الفريقين تقابلوا قبل كدة ٤ مرات في جميع المسابقات الاوروبية لم يخسر ليڤربول في اي مباراة منهم بواقع انتصارين وتعادلين.

الجدير بالذكر ان ليڤربول اتأهل الموسم ده لدور ال١٦ للمرة الأولى منذ موسم ٢٠٠٨/٢٠٠٩

بركاتك يا صلاح!

Comments