خمس علامات تدل ان عندك اكتئاب

مؤخراً، بقينا بنسمع كلمة ” إكتئاب ” أو ” أنا مكتئب ” كتير جداً.. لدرجة ان في ناس واخدة الموضوع Trend وهزار.. وناس كتير بدأت تدَّعي الاكتئاب كنوع من أنواع الحصول على الشفقة.. واللي عندهم إكتئاب بجد تاهوا وسط المدَّعيين.. ده بالعكس، معظم اللي عندهم اكتئاب فعلاً بيبقوا رافضين الاعتراف بيه..

احنا كشعب مصري معندناش اوي ثقافة احترام الاكتئاب واعتباره مرض وليه تشخيص وعلاج، وانك تروح عند Psychiatrist أو طبيب نفسي شئ مبيجيش على بالنا او بنتكسف نقوله، ونبدأ ندور على حلول ونستعين بكلام ناس مش دارسة.. وما أكثر الفتي في الحالات دي.. مع ان الموضوع مش عيب اطلاقاً بالعكس, تشخيص حالتك ومعرفة علاجك احسن بكتير من انك تسكت وتسيب ” المرض ” يآكل في اعصابك ودماغك..

طيب ازاي ممكن نعرف اذا كنا مصابين بالاكتئاب ولا لأ؟ وممكن فعلا نبقى مصابين بيه ومتعايشين معاه واحنا واخدين بالنا؟

في دراسات كتير بتوضح بعض المؤشرات اللي تخليك تعرف اذا كنت مصاب بالاكتئاب وانت مش عارف.. هنتكلم هنا على 5 مؤشرات منهم:

-بتعمل مجهود أكتر، مش أذكى

لما تلاقي نفسك عاجز عن رؤية حلول جديدة لمشاكلك, فتلاقي نفس بتكرر نفس الحلول القديمة..  بتتعب نفسك عالفاضي زي ما بيقولوا.

-بتضحك وتعيط في اوقات غريبة

تلاقي ردود افعالك مش متناسبة مع المواقف.. مثلا بعد ما اتكرمت وخدت شهادة مهمة، تلاقيك بترميها في اي حتة ومش مهتم بيها.. او تعيط وانت بتتفرج على ناشيونال جيوجرافيك عشان في حيوان اتقتل.. تسمع خبر وحش فتقوم تحضر الغدا.. وهكذا..

-مش قادر تركز

افكار كتيرة في دماغك مش عارف تسيطر عليها من كتير الزحمة والتفكير، على طول مشتت

-مش حاسس بحاجة

تلاقي نفسك مش عارف لا تفرح ولا تزعل.. مش قادر تستوعب يعني ايه شعور.. ناس صحابك يكلموك عن الحب وعن علاقاتهم واد ايه هما مبسوطين مثلاً تلاقي نفسك مش قادر تتخيل شعورهم ده.. بتبذل مجهود كبير جداً عشان تحس بأي حاجة وغالبا مبتعرفش..

-الخلافات البسيطة بتتحول لصراعات

بتاخد كل حاجة على اعصابك.. بتبقى خايف حد يشوفك مغفل او عبيط فبتبدأ تكبر المواضيع وممكن اللي قدامك ميبقاش قاصد حاجة اصلاً، بس مجرد خوفك بيخليك تحوَّل كل حاجة صغيرة لمشكلة.

الخلاصة.. Abraham Maslow، واحد من أكتر علماء النفس تأثيراً في أمريكا، قال:

“What is necessary to change a person is to change his awareness of himself”

لازم تعرف انت عندك ايه واللي عندك سببه ايه وتشوف علاجه.. مفيش حاجة اسمها هتتحل بالوقت وتسيب كل حاجة تتراكم فوق دماغك لحد ما المشكلة تكبر أكتر وعلاجها يبقى اصعب..

ربنا يجعلكم أبعد ما يكون عن الاكتئاب.. بس كده

Comments