على طريقة هيبتا, مراحل الدايت السبعة

الدايت! البعبع فى حياة أى أكيل أو أكيلة. لو أنت مش من القلة المحظوظين اللى فى مجتمعنا اللى بياكلوا و مايتخنوش يبقى حاجة من اتنين, يا اما أنت شخص متعايش مع كرشك و جنابك (و أنا أحييك على هذا الموضوع), يا اما الدايت عدى عليك ولو مرة واحدة فى حياتك. الدايت مش حاجة سهلة أبداً و كثير مننا مش بيعرف يفهمها, و على طريقة هيبتا زى ما فى 7 مراحل للحب, أحنا عملنالكوا مراحل الدايت السبعة.

1- القرار

بتلاحظ أن كرشك دلدل, بتنهج وانت على السلم الكهرباء, بتاخد مكان شخصين فى المترو (ده لو لقيت مكان أصلاُ). بتبدأ تبص على صور الناس فى الساحل و تقول “أنا عايز من ده يا حزمبل”. بتقرر أنك لازم تبدأ تظبط أكلك و تمشى على دايت محترم و تقطع علاقتك بالشاورما و النوتيلا و تخش فى علاقة جديدة مع العيش السن و التونا و الزبادى. المرحلة دى محتاجة عزيمة قوية وتنفيذ فورى, يعنى ماتقولش أنا هبدأ من الأسبوع الجاى ماتستعبطش. إيتس ناو أور نيڨر. فى المرحلة دى يفضل أنك تقرر معاها أنك تبتدى رياضة ولو حتى مشى كل يوم.

إكس لارج

2- الخطوة الأولى

خلاص ابتديت؟ تخلصت من الشوكولاتة و العيش الفينو و بواقى الفطير الحادق اللى عندك فى الثلاجة و اشتركت فى الچيم اللى جنبك؟ ألف مبروك. أنت دلوقتى فى المرحلة اللى طبقاً للإحصائيات اللى أنا لسة مألفها دلوقتى, 75% من الناس مش بيعدوها. المرحلة دى مرحلة مصيرية فى مشوار أى دايت و بتكون مدتها تقريباً من يومين لأسبوع و نص. لو عدتها بسلام يبقى أنت فعلاً فى أمل فيك أنك تكمل.

mentor

3- الثبات الإنفعالى

قد تسمى أيضاً بمرحلة الإغراء. الواحد لما بييجى يعمل دايت فى حاجات غريبة جداً بتحصل, بتلاقى أمك عاملالك محشى و مكرونة بالباشاميل و رقاق فى نفس اليوم. بتلاقى عمتك داخلة عليك بصينية بسبوسة و أبوك أترقى فى الشغل فيعزمكوا على بيتزا. حتى الثلاجة اللى كنت بتفتحها قبل الدايت تلاقيها فاضية, لما تفتحها فى الدايت بتلاقى حاجات أول مرة تشوفها زى بواقى التورتة من عيد ميلادك اللى كان من شهرين و الغريبة أن الأكل فى الدايت كل مابتاخد منه بتفتح الثلاجة تلاقيه زايد عن أخر مرة! حتى الآن عجز العلماء عن تفسير هذه الظاهرة الغريبة ولكن أغلب الظن أن للفضائيين يد فى هذا الموضوع. فى المرحلة دى لازم تجمد و تقاوم الإغراء و ترضى بنصيبك و بالتفاحة اللى فى إيدك.

4- التعود

بعد ما بيكون عدى عليك حوالى من شهر لـ45 يوم دايت, جسمك بيبدأ يتعود و الهفتان بيبدأ يقل شوية. حتى أهلك بيبدأوا يتعودوا على نظامك الجديد و يفهموا أنك ناويها بجد المرادى و بيبطلوا يعرضوا عليك الأكل الدسم و ممكن حتى تلاقيهم بدأوا يتشجعوا بيك و يبتدوا مشوار التخسيس هما كمان.

giphy (10)

5- لا تراجع ولا إستسلام

قد تكون المرحلة الأخطر فى مشوار أى دايت و اللى يا توصلك للى أنت عايزه يا تهدلك كل التعب اللى فات. هنا بتبدأ تحس أنك أتخنقت من الدايت و أن كل الناس بيكالوا براحتهم ماعدا أنت. ممكن حتى تلاقى جسمك مابقاش بيخس مع أنك لسة مكمل بانتظام. فى الوقت ده أنت يا تستسلم لأفكارك و تقول خربانة خربانة وتبوظ تعب شهور, يا اما تبقى أقوى من الضغوط و تفتكر أنت ليه بدأت أصلاً و تكمل عشان توصل لهدفك. فى حالة أن الجسم بيوقف تخسيس أنصحك أنك تاخد يومين أو ثلاثة فري بدل يوم واحد (أسبوع واحد بس مش كل أسبوع) عشان تفكر جسمك أنه لسة محتاج يحرق و بعدين تكمل دايت تانى عادى.

لا تراجع ولا إستسلام

6- الlong-term relationship

ده للناس اللى بتكون عايزة تخس 7 كيلو فيما فوق ببطء و بطريقة صحية. الدايت هنا بيبدأ من 6 شهور و ممكن يقعد سنين على حسب أنت محتاج تخس كام كيلو. هنا الدايت بيبقى خلاص جزء أساسى من حياتك و مبقاش بيضايقك زى الأول. لو كنت بدأت تلعب رياضة كمان, هتلاقى أنك مابقتش قادر تستغنى عن الروتين الرياضى فى حياتك و ماتعرفش تكمل يومك من غير ما تاخد الكمية اليومية من الرياضة اللى انت متعود عليها.

tumblr_n8jixqTgcV1tzb77ro1_500

7- هيبتا

ألف ألف مبروك أنت وصلت للمرحلة اللى قليلين جدا بيوصلولها. أنت دلوقتى جسمك أختلف تماماً عن أول ما ابتديت و لبسك بقى كله واسع عليك. هتلافى دايماُ الناس اللى ماشافوكش بقالهم فترة مش مصدقين التغيير الجذرى اللى حصلك و كل صحابك اللى عندهم وزن زايد هيجولك ياخدوا منك نصايح. أهم حاجة هنا هى التثبيت. أساسى جداً هنا أنك تاكل براحتك بس ماتأڨورش. كل والعب رياضة كثير او احسب الكالوريز بتاعتك و لو حسيت للحظة انك بدأت تتخن ولو حاجة صغيرة جداُ أمسك نفسك على طول عشان ماتضطرش تعيد الموضوع ده كله من الأول.

raw

الموضوع مش سهل بس مافيش حاجة بتيجى بالساهل لو عايز تحقق نتيجة حلوة. و ماتنساش تاخد صورة قبل الدايت و بعده بنفس اللبس و ورينا الإنجاز يا بطل.

Comments