رحلة الإنتقال من Freshman إلى Senior

أول سنة جامعة دى لازم تكون صعبة, بنبتدى نكتشف كل حاجة فى الجامعة كده واحدة واحدة و نتفاجىء بعدم وجود طارق كابو أو princess الجامعة قاعدين على سلم المبنى و مفيش أغانى و كده, و بنتأقلم على الواقع و الحقيقة اللي قدامنا إنها أيام سودة و يارب تعدى. لو قررت تقارن بين نفسك أول سنة جامعة و بين أخر يوم ليك قبل حفلة التخرج, هتلاقى تغيرات كتيييير. عندك مثلاً

  • لبسك

فاكرين نزولة “اللبس الجديد للجامعة” اللي بتتعمل دايماً قبل دخولك أول يوم؟ تحسباً لوجود حاجة تلبسها الصبح و أنت نازل. اللبس ده مش هيكمل أسبوع فى الجامعة, و بتظهر بعد كده بيجامات و كروكس ونستخدم اللبس ده لخروجات و فسح أحسن.

  • المصروف

broke

أول ترم فى الجامعة ده بتنزل من بيتك و معاك مش أقل من100 جنية, وخصوصا لو إنت فى جامعة فيهاFood court  و مش كانتيين جدو. الموضوع بيبقى أسهل للإفلاس. بس كده كده لو جامعتك مفيهاش الكلام ده فبتطلع برا تجيب أكل و ترجع عادى, كل ده بقى هيبتدى يقل مع الوقت, أما تلاقى فلوسك بتختفى فين معرفش و كل يوم بتصرف قد كده, هتحمد ربنا على الكانتين و يبقى رضا.

  • Clubs

دول بقى بتتحمس دايما تدخل كل واحد و ال Members يقنعوك إنك تقدم و تتسحل فى الحوارات دى لكن فى الأخر يا إما بتثبت على واحد أو بتكبر دماغك من كل ده و تخليك فى الأنت فيه أحسن.

  • صحاب

فأول سنة فى الجامعة بتمشى تتصاحب على خلق الله خصوصا وقت ال Gaps و تحاول يبقى ليك صحاب كتير عشان تعرف هى الناس هنا عاملة إزاى. و مع الوقت بتبقي هى شلة صغيرة كده ولا واحد أو أتنين اللي هتتصاحب عليهم و مش هتحاول تتعرف على أى بنى أدم تانى.

  • نظرية ال Group Project

جملة الهلس و الضحك فى المدرسة و الرعب فى الجامعة. فى الأول هيعجبك الموضوع و تقول أسهل يبقى الشغل متقسم أو واحد دحيح هيعمله كله, لكن الحقيقة إنها بداية اللعنة, و الصحاب اللي اتعرفت عليهم دول إحتمال كبير تخسرهم بعدها. و أنت و حظك بقى وقت مشروع التخرج..

ولكن فى الأخر حياة الجامعة حلوة برده و حاول مهما إتفصلت من صحاب ولا دكتور مادة معينة إنك تتأقلم على كل حاجة و تكتشفها جديد, لكن معلومة أكيدة لازم الكل يبقى عارفها, المدرسة هتفضل أحلى أيام حياتنا.

Comments