6 أشخاص حاول متبقاش زيهم وأنت داخل الجامعة

الجامعة دخلت و موسم السف علي طلاب سنة أولي بدأ, عشان كدة قررنا نعملك دليل صغير يخليك تهرب من السف ده! الشخصيات اللي في المقال ده أشهر الناس اللي بنقابلها في الجامعة -للأسف- يمكن عشان كل شخص منهم أوفر في شئ ما و احنا بنبقي نازلين الصبح نفسنا في ناس طبيعية يعني.. المهم, حاول متبقاش كدة
– الظريف:

WhatsApp Image 2017-09-21 at 1.46.36 PM
دا بييجي الجامعة يستظرف في المحاضرات، بيبقى باين يعني هتلاقيه قاعد مستني الدكتور يوقف كلام عشان يقول التعليق بتاعه. حاول متبقاش الشخص دا، مش هتبقى مبسوط وأنت عندك 54 سنة ولسا في سنة اولى.

– الدحيح:

WhatsApp Image 2017-09-21 at 1.46.35 PM
قاعد في أول بنش، على طول ماسك حاجة بيقرأ فيها أو بيكتب حاجة. مبيغشش حد، وعلى طول فاهم المحاضرة، مقفل الكويزات كلها وبيبقى مسلم الassignments قبل الdeadline… قبل ما نعرف إن في assignments أصلا, مستحيل يساعدك بمعلومة حتي لو المعلومة دي الساعة كام مثلاً. حاول متبقاش الشخص دا، محدش بيحبه. خليك ذكي و  لو انت بطبعك شاطر اكسب اللي حواليك و ساعدهم.

– الفاشونيستا:

WhatsApp Image 2017-09-21 at 1.46.36 PM (1)
هدوم ملفتة للنظر…أوي، وكل أما بتشوفهم بيبقو لابسين طقم مختلف، لو شوفتهم مرتين في اليوم هتشوفهم بطقمين مختلفين عادي. حاول متبقاش الشخص دا لأن الناس كلها مش هتشوفك غير بطريقة واحدة بس؛ محمد هنيدي في صعيدي في الجامعة الأمريكية.

– الحبّيبة:

WhatsApp Image 2017-09-21 at 1.46.36 PM (2)
إتنين مالهمش علاقة بالعالم دي كلها هم جم الجامعة وقرروا ويعيشوا قصة حبهم قدامنا كلنا. تقريبا ميعرفوش إنهم في جامعة لأنهم ميبحضروش محاضرات هم بيروحو يشتروا أكل ويقعدو في أي حتة مع بعض وبعدين يروحو بيوتهم، حاول متبقاش كدا عشان هيتسف عليك… كتير.

-الbest friend بتاع البنات كلها:

WhatsApp Image 2017-09-19 at 1.10.33 AM
بيبقى ليه أكتر من إسم وكل بنت بتناديه بإسم غريب يخليك تشك فيه أكتر من الإسم اللي قبله ؛ مودي، منمن، مومو…إلخ. هو اللي بيحللهم مشاكلهم كلها وبيبقى غالباً عامل زي الدبدوب أو زي شيكو في خلصانة بشياكة. المهم يعني حاول متبقاش الشخص دا عشان هيتسف عليك زي الأتنين اللي فوق دول كدا بالظبط…ممكن أكتر شوية.

– اللي مبيحضرش أصلاَ:

2a-na-57809
ودا في الغالب بيبقا الشخص اللي دايماً بيجي قبل الخروجة ويقول مش هعرف أنزل عشان مشغول ويخش ينام ومكانه المفضل بيكون أوضته…بعديها القهوة. بيتصدم كل سنة لما يسأل صاحبه على معاد الميدتيرم بعدين يكتشف إن الفاينال كان من يومين. حاول متبقاش الشخص دا…أو خليك زيه بس إلحق الفاينال على الأقل.

Comments