اعرف إزاي ترتبط من غير الدراما: أهم 5 احتياطات قبل قرار الارتباط

خلاص قررت إنك تشيل التراب على عليك وبدأت تحس إنك محتاج حد في حياتك؟ الوحدة بدأت تاكل فيك ومبقتش قادر تستحملها و قرار الارتباط مسيطر على عقلك وقلبك ومستني الشخص المناسب؟ خلاص داخل عليك أهو.. قرّب خلاص.. قرّب جداً.. هوب.. استنى!

استنى طبعا! انت فاكر الموضوع بالساهل كده؟ فاكر انك هتلاقي الشخص المناسب عادي كده وتكمل معاه! لازم الأول تعرف ان في حاجات كتيرة لازم تاخد بالك منها.

في المقالة دي هعرفك على أهم 5 احتياطات لازم تاخد بالك منها قبل ما تعمل العَملة دي.

1- متستعجلش

BeFunky_BeFunky_Untitledjpg1jpg

اه طبعا متستعجلش, مش بس عشان متوجعش قلب حد تاني معاك. ده عشانك انت كمان. انت المفروض عارف قيمة نفسك والمفروض أكتر انك تخاف عليها مش تفضل تستهلك فيها كده وتخلي أي حد ياخد منها.. ولا ايه يابني ؟

2- فكّرت؟ فكر تاني

T1460563625aeca50bfe34ce949e7335976838db058image.jpgw724h408

ليه بقى ؟ عشان صحابك اللي حواليك اللي هيتبهدلوا معاك لما تتخانقوا ولا تكتئبوا ولا يحصلكم اي مشكلة.. صحابك مش لعبة في ايدك دول بني آدمين ونفسهم يعيشوا والله واهلهم محتاجينهم جداً.. معايا ولا ايه؟

3- متصدقش أول مرة

snapsh10

أول مرة دي الطرفين بيظهروا قصاد بعض في أبهى صورة.. وانا وانت كبار وعارفين الـ First impressions اخرتها ايه.. ولا مش عارف؟ شكلك مش عارف

4- استشير ذوي الخبرة

عارف صاحبك اللي كنت بتتريق عليه عشان بيصاحب كتير؟ عارفة صاحبتك اللي مكنتش عجباكي عشان كل يوم بتحكيلك على واحد مختلف؟ زعلانين منك اكيد مش كده؟ صالحوهم بقى.. طبعا لازم تصالحوهم لان ده وقتهم. هتلاقي فين قاموس علاقات متحرك كده غير فيهم؟ الناس دي رغم اعتراضك عليهم بس هما المفتاح والسبيل لزيادة معرفتك وخبرتك عن العلاقات في وقت اسرع وبشكل عملي.

5- خليك نفسك

متحاولش تغيّر في نفسك عشان تعجب حد أو عشان تلاقي ناس تحبك.. لأنك لو اتغيرت عشان حد بكرة الحد ده يمشي وهيمشي معاه سبب تغيرك وهترجع زي ما كنت.. وساعتها هترجع لنقطة (2) تاني وهتوجع دماغ صحابك.. وانا خايف على صحابك والله

وأخيراً, النصايح دي المقصود منها اكبر بكتير من كونها شوية نصايح تقراهم وتضحك وخلاص. الموضوع فعلا محتاج تفكير. عُمر الحب اللي انت نفسك فيه ما هيجي طول مانت بتدور عليه او مستنيه عشان اأهم ميزة في الحب من وجهة نظري انه بيجي مرة واحدة يخبطك على عينك من غير ما تبقى واخد بالك, حاجة كده بتحصل spontaneously من غير ترتيب.

Comments