مصر في كاس العالم: فاضل علي المونديال تَكّة

الحمدلله امبارح عدى على خير وكسبنا أوغندا 1-0 على استاد برج العرب بعد جون محمد صلاح و وصلنا للنقطة 9 من أربع مباريات .. كسبنا 3 مباريات وخسرنا واحدة .. في حين تراجعت أوغندا للمركز التاني برصيد 7 نقاط من مكسبين وتعادل وخسارة

على الجانب الآخر غانا تفوقت على الكونغو بنتيجة كبيرة 5-1 برصيد 5 نقاط في المركز التالي

كده ترتيب المجموعة أصبح على النحو التالي :

مصر 9 نقاط .. اوغندا 7 نقاط .. غانا 5 نقاط .. الكونغو نقطة واحدة

طيب ايه بقى الاحتمالات اللي تخلينا نصعد لكأس العالم روسيا 2018؟

فاضل في التصفيات جولتين.. الجولة الجاية هنلاعب الكونغو على أرضنا يوم 8 أكتوبر الساعة 7 مساءاً.. والجولة الاخيرة هنلاعب غانا على أرضها يوم 6 نوفمبر الساعة 2 ظهراً

لو كسبنا الماتشين بغض النظر عن أي نتيجة تانية نتأهل لكأس العالم -من غير ما نقاطع-

لو كسبنا ماتش الكونغو القادم (يوم 8 اكتوبر) وغانا كسبت او اتعادلت مع أوغندا (يوم 7 اكتوبر) نتأهل مباشرةً بغض النظر عن نتيجة الجولة الاخيرة

مش عايزين ندخل نفسنا في دوامة لو خسرنا او اتعادلنا لاننا هنكون بنصعب الموضوع على نفسنا وبنضيع فرصة سهلة للتأهل لكأس العالم بعد غياب 27 سنة.. واثقين في رجالة المنتخب اللي شايلين مسئولية إسعاد 90 مليون مصري، و هيكتور كوبر اللي لحد اللحظة دي ماشي بمعدل كويس بس محتاجين أحسن عشان غالباً علي ما نتأهل نص الشعب المصري هيكون جاله الضغط.

Comments