حلم التسعين مليون: مكان مصر في تصفيات كأس العالم

كاس العالم.. الحلم اللي بنحلم نوصله من بعد آخر مرة صعدنا سنة 1990 و كل مرة بنقول هنصعد ونبقى قربنا خلاص و يحصل حاجة تخلينا منوصلش.. اقربهم كانوا آخر نسختين؛ تصفيات جنوب افريقيا 2010 اللي موصلناش فيها بعد ما خسرنا ماتش الجزائر في السودان, والبرازيل 2014 اللي وصلنا لاخر ماتش في التصفيات وبعدين خسرنا من غانا في الذهاب 6-1..

المرة دي الحلم قريب, بس نفسنا يتحقق بقى مش زي كل مرة. لحد دلوقتي ماشيين كويس جداً في التصفيات في مجموعتنا اللي فيها غانا وأوغندا والكونغو.. كسبنا الكونغو في أول ماتش 2-1 .. وكسبنا غانا 2-0 في الماتش التاني

بكرة عندنا تالت ماتش مع أوغندا على أرضها الساعة 3 عصراً بتوقيت مصر.. أوغندا اللي معاها 4 نقاط لحد دلوقتي بعد ما اتعادلت مع غانا وكسبت الكونغو. هنلاعبها على أرضها الجولة دي والجولة الرابعة هيكون الماتش على أرضنا يوم 5 سبتمبر الساعة 8 مساءً بتوقيت مصر. ماتشين ورا بعض لو كسبناهم هنضمن التأهل بنسبة كبيرة جداً, بس مينفعش نستهين بأوغندا اللي ليها فرصة كبيرة بردو ومتمسكة بيها جدًا على حسب تصريحات المدير الفني للمنتخب الاوغندي موسيس بوسينا

الارجنتيني هيكتور كوبر المدير الفني لمنتخب مصر كان ضم 30 لاعب لمعسكر المنتخب وبعدين استبعد مصطفى فتحي للاصابة و أعلن امبارح عن استبعاد 4 آخرين هما محمد عواد، محمود عزت، أيمن أشرف وأحمد الشيخ.. في انتظار استبعاد لاعبين كمان لأن قائمة المباراة لازم تبقى 23 لاعب فقط

كل التوفيق للمنتخب في مشواره في تصفيات كاس العالم.. نتمنى نشوف ماتش يليق بمنتخبنا ويفرحونا ونقدر المرة دي نوصل لحلم المصريين كلهم.

Comments