قواعد دخول السينما: ازاي تتبسط و تسيب الناس تتبسط

خلينا مُتفقين ان السينما صناعة، تجارة، و فن.. يعني لازم تفهم ان الفيلم اللي بتدخل تشوفه ده بيمر بمراحل كثير و صعبه جداً عشان يوصلك، و بيشتغل عليه مئات من الناس، يعني احترامه حاجه مافيهاش نقاش.

دي قواعد حاول تمشي عليها اما تدخل السينما:

١- موبيالك في جيبك:

Turn-Off-Your-Cell-Phones

هو إيه الصعب في إن كل واحد يقفل موبايله و يحطه في جيبه أو الشنطة و نقعد نتفرج في هدوء؟ بدل ما تكلم زميلك في الشغل أو صاحبتك ينكدوا عليك، عيش حياة أبطال الفيلم و انسي حياتك انت ساعتين بس!

٢- كل فشار من غير صوت:

article-0-18BAC49E00000578-738_634x382

للأسف ان في مبدأ الأكل في السينما، بس ممكن ناكل بصوت واطي؟ و منوقعش الفشار علي الارض بحجة ان فيه حد بيلم ورانا؟

٣- انت مش مُعلق صوتي:

movieninjas91201121

احنا مش جايبين حضرتك الفيلم تعلق علي أفعال الشخصيات، يعني لو انت قلت للبطل “متفتحش الباب هيموتك يا اهبل!” هو هيقولك شكراً يا باشا مصر انت انقذت حياتي؟ ليه الفصلان؟

٤- الضحك في السينما من غير سبب، قلة….

9

لو بتتفرج علي فيلم كوميدي اضحك للصبح عشان ولله ضحكة حضرتك بتفرحنا، بس لو فيلم رعب او مشهد جد جدا، ايه اللذيذ في ان حضرتك تقع من الضحك و تكركر اوي؟ و متقوليش انا حر ابقي اطلع اضحك بره يا حبيبي!

٥- (الأهم) اطفال في السينما، لأ!

e44c

“بيان هام و عاجل، تعلن السينمات العالمية و المحلية عن منع دخول الأطفال السينما لأقل من ١٢ عام، و نتمني لأطفالكم نوما هادئاً و لو مش قد الخلفه متخلفوش”

دي غالباً اكتر جمله نفسي اسمعها في حياتي، ولله العظيم فاهمة و مقدرة إن الخلفه مش سهلة و إن انت كأب و حضرتك كأم نفسكوا تدخلوا سينما، بس ممكن نسيب ابننا الجميل عند أي حد من أهلنا ساعتين بس؟ عشان العياط الهيستيري و بابا أنا عايز اروح الحمام و كده آخر حاجه الناس اللي معاكم في قاعة العرض مهتمه تسمعها؟

ببساطه، احنا مش بنقلل و لا بننتقد حد، الموضوع و ما فيه ان فيه ناس مش بتنام شهور و بتسيب بيوتها عشان الفيلم ده يتقدم لحضرتك، يا ريت المره الجايه و انت داخل السينما تطبق القواعد دي، و تستمتع بفكرة انك عندك فرصه تعيش حياة غيرك حياتك لمدة ساعتين.

Comments