أفلام عيد 2017: هتدخل فيلم ايه في العيد؟

السينما من الحاجات المرتبطة عندنا كمصريين بالأعياد, و لأن العيد خلاص قرب و خروجاتنا مع أصحابنا و قرايبنا بتكمل بفيلم حلو.. قررنا  نجيبلك أفلام العيد السنة دس عشان تحدد هتدخل فيلم إي

الكنز

فيلم لشريف عرفة, بيجمعلنا أحداث الفيلم بين 3 عصور: العصر الفرعوني و العصر المملوكي و النصف الأول من القرن العشرين و بتدور الأحداث بين الفساد و سطوة رجال الدين على السلطة و اقتحام الدين للسياسة. الفيلم من تأليف عبد الرحمن كمال و بيجمع عدد كبير من الممثليين اللي مشوفناش عمل بيجمعهم قبل كده, منهم محمد سعد اللي أخيراً تخلص من شخصية اللمبي و قرر يظهرلنا موهبة مرعبة ظهرت في الإعلان و محمد رمضان و هند صبري و روبي و أمينة خليل و أحمد رزق.

خير و بركة

علي ربيع بمشاركة محمد عبد الرحمن و كريم عفيفي في فيلم أكيد كوميدي من اخراج سامح عبد العزيز. و لأن بيومي فؤاد وحشنا ف هنستناه العيد ده في خير و بركة بالاضافة لتارا عماد و مي سليم و الفنان الكبير سيد رجب و ظهور خاص في الفيلم لهيفاء وهبي.

الخلية

نيجي للأكشن بقى.. أحمد عز كظابط عمليات خاصة بيقوم بمطاردة الخلايا الارهابية و الضغوطات و المصاعب اللي بيتعرضلها. الفيلم من اخراج طارق العريان و تأليف صلاح الجهيني. بيشارك أحمد عز نجم التمثيل تايسون (محمد ممدوح) اللي دايما بيبهرنا بأي عمل ليه و معاهم أمينة خليل و سامر المصري.

شنطة حمزة

حمادة هلال بدور نصاب محترف في فيلم من تأليف أحمد عبدالله و اخراج أكرم فاروق. بيشاركه النجم بيومي فؤاد و يسرا اللوزي و هنا الزاهد.

و من الأفلام اللي كانت منتظرة في العيد الكبير هو فيلم الشيخ جاكسون و لكن مخرج الفيلم عمرو سلامة نشر انه تم تأجيل عرض الفيلم لأن عرضه الأول عالميا هيكون في مهرجان تورونتو و هيعلن قريبا عن معاد طرحه في مصر. الفيلم بطولة أحمد الفيشاوي و ماجد الكدواني و أحمد مالك و أمينة خليل. الواضح من الإعلان إن عمرو سلام أبدع في الشيخ جاكسون, و رغم الجدل المتوقع بس الأكيد هنشوف حاجة مشوفنهاش في السينما المصرية قبل كدة.

دلوقتي تقدر تقولنا هتجمع صحابك (و فلوسك) و تروحوا فيلم ايه؟

 

Comments