أنواع الناس اللي لازم تتجنبها لما تاخد قرار السفر

معظم جيلنا دلوقتي بقى بيفكر في السفر كحل أول وأخير عشان عايزين نشوف ناس مختلفة بعادات وتقاليد وطريقة معيشة مختلفة.. عايزين نحقق طموح وحلم صعب نحققه لو فضلنا في مكاننا.. بنضحي بحاجات كتير زي أهلنا وصحابنا والمكان اللي اتربينا فيه والذكريات الحلوة والوحشة مع كل الاماكن اللي مشينا فيها.. ونروح لعالم مجهول نكتشفه لأول مرة في حياتنا. بس مش ده موضوعنا, موضوعنا بقى الناس اللي حواليك بتشوف خطوة زي دي ازاي

في أنواع كتير بس هنركز هنا أكتر على أهم أربع أشخاص هتقابلهم لما تمشي في خطوة زي دي أو لما تنفذها فعلا..

أول شخصية : المحبط

WhatsApp Image 2017-08-19 at 4.26.38 PM
” يابني البلد دي أحسن من غيرها، هتعمل ايه يعني اما تسافر! هما اللي سافروا خدوا ايه! بلدك أولى بيك.. وبعدين بدل ما تتبهدل برا اتبهدل في بلدك وسط اهلك وناسك ”
تجنب الشخصية دي تماما.. لانها هتعيش وتموت مكانها من غير ما تتقدم خطوة واحدة

تاني شخصية : ال “ده زمانه هايص “

C4K6NvFXAAEI6si
” يابن المحظوظة! ده انت زمانك عايش ومقضيها وسايبنا هنا في القرف اللي احنا فيه ده ولا على بالك.. اكيد طبعا بتسهر وبتخرج وبتصرف والعيشة ارتاحت عالأخر! ”
ده بقى قصة تانية خالص, ده مش بس شايف حاجات مش بتحصل لأ ده ناسي كمان التضحيات اللي قدمتها وكمية المعافرة اللي عملتها عشان تسافر..

تالت شخصية : الفتاي


” لالا حلو موضوع السفر ده.. انت قولتلي رايح فين؟ السودان؟ جميلة جدا السودان.. ومقولكش بقى الشتا هناك عالمي كله تلج وبرد وحاجة حلوة خالص ”
ده لو قولتله انك رايح بلد لسه فاتحة جديد حتى هيطلع عارف عنها كل حاجة كإنه عايش هناك.. مفيش حاجة اسمها ميعرفش.. وواثق جدا من كلامه.. إوعى تعتمد عليه

“رابع شخصية : ال ” الصين حلوة”

WhatsApp Image 2017-08-19 at 4.26.39 PM
ده تقريبا بيبقى عاملك مفاجأة هناك.. بتعتمد على كلامه وتمشي في الموضوغ وتسافر وأول ما هتوصل هتعرف ايه المفاجأة.. ربنا يكون في عونك.. بجد!

وأخيرا, لو ناوي تسافر متحاولش تمشي ورا تجربة حد او كلام حد.. اعمل تجربتك انت بكل ما فيها من حلو ووحش.. جرب وافشل وجرب تاني لحد ما هتلاقي كل حاجة بتتظبط معاك.. بس بلاش تفضل في نفس المكان طول حياتك, اوحش حاجة ممكن يعملها الانسان انه يفضل في مكانه!

Comments