دليلك لمعرفة كل محل أكل بيعرف يعمل إيه

محلات أكل كثيرة جداً بتكون متميزة فى حاجة معينة و مش قد كدة أو مستواها متوسط فى حاجات تانية, الشطارة هنا أنك تعرف الحاجة اللى انت عايزها تجيبها منين و كل مكان إيه التخصص بتاعه اللى بيبدع فيه. عشان كدة قررنا نعملك دليل معرفة تجيب ايه و منين..

خلونا نبتدى بقائمة المخبوزات.

سدرة

سدرة من أشهر الأسامى فى مجال المخبوزات و لسبب واضح. حتى الآن مجربتش مكان بيعمل الكرواسون أو الباتيه أحسن منه و مع أنى مش من هواة الكرواسون السادة الا أن سدرة هو الوحيد اللى أثبتلى أن الكرواسون السادة فعلاً ليه لازمة.

نابولى

عندما تذكر المخبوزات يذكر نابولى. نابولى من أقدم الأماكن فى مصر اللى بتقدم مخبوزات أقل ما يقال عليها أنها هايلة. المكان محتفظ بالشكل القديم بتاعه و الكلام ده بيبان أوى فى الديكورات القديمة بتاعتهم و ماكينة الكاشير الأنتيكة و حتى الناس اللى شغالين هناك. تخصصهم العيش الفينو و تقريباً أحسن ناس فى مصر بيعملوه, بس الثمن أغلى من المعتاد و لازم تروح الصبح بدرى جداً عشان تلاقى.

واحة عمر

راجع من الساحل و جعت فى نص السكة؟ عليك و على فطير واحة عمر المشلتت. من أجمل الأماكن اللى بتعمل فطير مشلتت فى مصر و دي حاجة مش سهل تلاقيها بتتعمل حلو كدة.

خلصنا من المخبوزات؟ نخش عالتقيل بقى و الفاست فود بأنواعه

Food Gun

فود جان من محلات البرجر الجديدة اللى أثبتت مكانها فى ساحة البرجر المصرية و رغم أنهم محل صغير و مستخبى نسبياً الا انه فى وقت قليل جداً بقى مشهور جداً وسط الأكيلة. أكثر حاجة بتميز فود جان أن طعم اللحمة باين فيها النضافة جداً و واضح أنها أولوية عندهم زى الطعم بالظبط اللى لا يقل جمالاً عن النضافة اللى فى الأكل. لو روحت حاول تطلب حاجة ماعلهاش أضافات كثير عشان تحس بطعم البرجر فعلاً.

فطاطرى وائل

و لو أنى ماعتقدش أن فى حد أكيل مايعرفش الأسم بس هنعمل حساب الناس المبتدئة برضه. الفطير يعنى وائل, إند أوف تكست. البيتزا بتاعته لطيفة بس مش مميزة بس ماقدرش أقول نفس الشئ على فطيرة البسطرمة بتاعته, حاجة كدة تستاهل بق حضرتك.

Primo’s

مش هحور و أقول أن البيتزا تخصصهم لأنى كلت من عندهم حاجات حسيتها مش مميزة خالص و ممكن تكون أقل من العادى كمان بس الكلام مختلف على بيتزا باربيكيو الفراخ بتاعتهم, هى دى تخصصهم بجد. طعم تحفة و هتسد معاك جامد مع أنها مش كبيرة أوى.

سيبنا بقى من كل اللى فات ده و نخش على القسم المفضل لناس كثير و أنا منهم, الحلو!

هنبتدى بالحلويات اللى بتتباع فى محلات الجاتوهات و التورت

زانوبيا

مكان لطيف جداً لو عندك عزومة و عايز تجيب حاجة و أنت رايح. تخصصهم اللى بيبدعوا فيه البسبوسة و إكلير الشوكولاتة و الكراميل بس نصيحة أبعد عن الكنافة بالمانجة بتاعتهم فى رمضان.

ليدام

أساتذة الشوكولاتة فى الجاتوهات و البتيفور. ليدام من الأماكن اللى عرفت أزاى تتاعمل مع الشوكولاتة صح و ده كان باين جداً فى جاتوهات الشوكولاتة و كنافة النوتيلا فى رمضان و طبعا فى أكثر حاجة بحبها هناك, الكساتة.

عندنا بقى محلات الحلويات اللى مش جاتوههات. ورقة و قلم و أكتبى معايا يا ست الكل

House of Cocoa

مكان الشوكولاتة رقم 1 فى مصر مع أن مستواهم مابقاش زى الأول لكن برضه هتفضل المولتن كيك و الهوت تشوكلت بتوعهم أحسن من أى شوكولاتة تانية فى مصر. بس هما تميزهم شوكولاتة بس يعنى أى حاجة تانية عندهم عادية جداً و ممكن تلاقى أحسن منها فى حتت تانية.

وافليشوس

كواحد غاوى وافلز أنا بعتبر المكان ده جنة. ماشوفتش لحد دلوقتى مكان بتاع وافلز عنده كل الإضافات دى اللى ممكن تحطها كلها لو عايز بس الموضوع محتاج خبير عشان يعملك وافل فيه أضافات كثير ماشية مع بعضها و مايكونش معكوك لأن ممكن حاجة حلوة أوى تتحط مع حاجة تانية حلوة أوى بس مايمشوش مع بعض. Choose wisely.

Grilla


أنا عارف أن جريلا تخصصه برجر و البرجر بتاعه من أكثر البرجرز الحلوة اللى كلتها بس خلونا نتكلم شوية عن الأوريو-نوتيلا تشيز كيك بتاعتهم. أنا مليش فى التشيز كيك بس هى البتاعة بتاعتهم دى مش تشيز كيك بمعنى الكلمة بس ده مايمنعش أنها حاجة ملائكية. حاجة كدة تخليك تبتسم مع أول معلقة تخش بقك و تستعيد الأمل فى الحياة تانى.

مش حاجة وحشة أن المطعم يكون مميز فى حاجة و حاجة لأ بس المهم أنك تعرف الحاجة اللى أنت عايزها مين أحسن واحد بيعملها عشان تعرف تكون أستاذ فى الأكل.

Comments