العف يتحدث: رحلة هشام عفيفي من قبل سيد أولي لديسباسيتو

بما ان العالم كله اتجه لسكة انه يبقي digital و الsocial media بقت مسيطرة علي المشهد حالياً, ده ساعد علي ظهور مواهب كتير كانت سيطرة التليفزيون منعانا منها, و من الحاجات اللي ظهرت كان العف. هشام عفيفي من الأشخاص المبهجة علي الsocial media و اللي بيعرف يسحبك للعالم بتاعه من أول دقيقة يتكلم فيها, عادي جداً تلاقي نفسك ماشي في الشارع بتغني “سيد أولي لسة يا عيني سنة أولي” أو تلاقيك اتسحلت في عشر حلقات من التحليل الاستراتيجي أو الفقرة الصباحية الجميلة ورا بعض.

المهم اننا اتكلمنا مع العف و عرفنا شوية حاجات لطيفة كدة عنه..

 إحكيلنا بدأت موضوع انك تبقي vlogger ازاي؟

انا قررت ابقى vlogger سنة 2007 تقريباً. وقتها مكانش معايا حاجة ابدأ بيها فكنت بستلف كاميرات من الناس اللي اعرفها وفضلت فترة بجرب فيها وكل التجارب معجبتنيش الصراحة، بدأت فعلياَ سنة 2011 بعد الثورة.

كنت بتعمل ايه قبل كدة؟ و هل لسة مكمل فيه؟

كنت بعمل فيديوهات عبيطة كده مكانتش علي شكل vlog كان كلها Edit و After effects و لسة مكمل فيها لحد دلوقتي.

 اكتر video بتحبه من اللي عملتهم؟

الفقره الصباحيه الجميله – عبده الشياطين

الفقرة الصباحية بدأت ازاي؟

 الفقره الصباحيه جات صدفة، أحمد حسن كلمني الساعه سبعة الصبح و قالي انه كان عايز يعمل حاجه أو بمعني ادق نعمل show فقلتله تعلالي و فتحنا الكاميرا وجات التسميه كدة تماشياً مع الموضوع.

لاحظنا إن رأيك ان الجواز حلو عكس اغلبنا يعني، تفتكر ايه سبب ظاهرة ان معظم الناس غير مقبلة أو خايفة من الموضوع ده؟

 الجواز عامة شركة صعبة جدًا، محتاجة شركاء او مديرين تنفيذيين محترفين عشان يقدروا ينسقوا مع بعض امور الشركة عشان في النهاية تنجح. و نسبة الحب بين الطرفين هي اللي بتخليك تختار انك تكمل رغم كل مشاكل الشركة.

إنما الخوف من الجواز في مصر بييجي من إن الموضوع مبيبقاش شركة، في الأغلب بيكون الراجل المدير و المتحكم و الزوجه مجرد شغالة عنده، فبالتالي الراجل غروره بيخليه يحس انه لو الموظف اللى عنده ده مش شغال كويس أو حتى لو زهق منه انه ممكن يوظف حد تاني.

حتى لو ده مش باين في العلن، بيبقى موجود بشكل ضمني، وفي model تاني، هو إن الزوجه بتشوف الزوج مجرد ممول للشركة أو shareholder بيضخ فلوس و دلع، و ده بردو مش تأسيس كويس لشركة محترمة، فبالتالي معظم الشركات عندنا بايظه ومناخ مش مناسب للاستثمار “الجواز” و ظالم للطرفين عشان كده الناس بتخاف منه.

ممكن نشوفك في برنامج تليفزيون ولا بتفضل الsocial media؟

موضوع التليفزيون معقد و محتاج اني افكر و اخد قرارات كتير في حاجات أنا لسة محسمتهاش. و عامة الاختيار صعب، في ظروف أخري كنت هقول الاتنين بس للأسف احنا معندناش هنا مجال للحرية المطلقة علي التليفزيون يخليني اقدم اللي انا عايزه و ده مخليني إلي حد ما مش ميال ليه.

كان ايه الgoal بتاعك لما بدأت؟ و هل وصلتله؟

مكانش عندي goal اوي الصراحة، كنت بعمل الشيء اللي بستمتع بيه بس. في الاول كنت بحاول أوصل رساله وما إلى ذلك، وبعد كده حسيت اني مبوصلش، فقررت ابقي أكثر ذكاءً في توصيل الرسالة. بس هو في الأغلب بيبقى استمتاع بالحاجه اكتر من اي شيء تاني.

ايه اكتر حاجة بتضحكك في الsocial media؟

بحب ال memes و الcomics, أي حاجة معمولة بذكاء بتعجبني عموماً.

كلمات الأغاني بتكون مكتوبة ولا ده نتاج اللي بيطلع قدام الكاميرا؟ و ايه اكتر أغنية بتحبها؟

معظم الحاجات ارتجال، و في أحيان قليلة بيكون مزيج من الارتجال و الكتابة بس معظمها بيبقى ارتجال فقط و بعدها بنعمل نسخه تسجيلية محترمة بس ليها.

بالنسبة لأكتر واحدة بحبها هي despacito و مسيرها تنزل كامله بكلماتها الكامله غير النسخه الي اتسربت.

 الشهرة فتحتلك أبواب جديدة أو ساعدتك في شغلك؟

 هنا الموضوع معقد شوية، لأن الشهره هي الي عملت معظم شغلي، و في نفس الوقت شغلي بيعمل شهرة. في بينهم علاقة طردية.

 لو هتقول نصيحة لأي حد عايز يمشي الطريق اللي انت مشيته في شغلك, هتنصحه بإيه؟

نصيحة، متعملش زيي

هشام عفيفي يعتبر من أحسن الحاجات اللي كسبناها من الsocial media, و شخصياً لازم اشكره علي كمية البهجة اللي بطلع بيها من الaccount بتاعه..  أياً كان اللي هو هيعمله قدام واثقين انه أكيد مش هيقل عبقرية عن اللي عمله قبل كدة.. 

Comments