سيبتوا بعض ليه؟ اجابات اكتر من ١٠ اشخاص عن سبب الفراق

كلنا حبينا و سيبنا أو اتسابنا من ناس، مهما حاولت تخبي و تنسى دايما فى حاجة هتفكرك بالقصة اللى انتهت و كان نفسك تِكمل، عشان كدا سألنا ناس مختلفة فى السن و الحالة الاجتماعية عشان نعرف سبب الفراق و ليه سابوا الناس اللى حبوهم.

“بعد سنة ونص من ارتباط كان داخل على خطوبة قالتلي كلم أهلي, كلمت باباها قالي “بس هي مفهماني انها مش عايزاك!”.. ساعتها عرفت ان في سنة ونص من حياتي كانوا كدب في كدب تقريباً” -ع.م، رجل، ٢٣ سنة

“لإنى كنت ست قوية و كتير عليه، و إني استحق أحسن منه بكتيير” -س.س، بنت، ٢١ سنة

“عشان فضلنا ٥ سنين مجرد صحاب و معترفتلهاش بحبي لاني كنت خايف اخسرها، و يوم ما قررت اقولها مهتمتش و سابتني.” – م.ع، رجل، ٢٢ سنة

“كان رومانسي بزيادة، لدرجة المحن يعني و مكنش عنده شخصية، كان بيخلي صاحبه يكلمني يتخانق معايا عشان هو مش عارف” – ا.ع، بنت، ٢١ سنة

“كنا صحاب قريبين، في تالتة جامعة و هى اللى طلبت نرتبط بعدين طَلبت إني أكلم أهلها و لما حكيت لهم عني رفضوني لأنهم شايفين إنى منفعش لا شكلاً ولا موضوعاً” م.ع، رجل، ٢٣ سنة

“كنت خارجة مع صحابي و كنت معاه قبلها، و هو كان واقف في الشارع و ماخدش بالي إنه موجود و اعتبر إني اتجاهلته قصد و اختفى من ساعتها” -ع.ى، بنت،٢٣ سنة

“عشان كان شايف إنى أحسن منه و بعرف أنظم حياتى كويس و هو مش عارف يفضي نفسه عشاني و هو اصلاً فاضى، جه في الآخر و قالى إنه مش مستعد يكمل فى علاقة و إنه مدمر نفسيا و ديه حِجة أغلب الولاد بتلجأ لها عشان تخلع بشياكة” -م.م، بنت،٢٠ سنة

“عشان كان بخيل و متناقض و عامل نفسه متدين و بيتدخل فى تفاصيل متخصهوش”- ا.س، بنت، ٢١ سنة

“زهق، ديما بزهق و مبكملش” -ا.م، رجل، ٢٣سنة

“مجاتش عزاء ابويا، مكانتش موجودة وقت ما احتاجتلها، حتي لما كنت بصدها كانت بتعيط،  كانت بتحاول تكون موجودة عشان دا اللى كان لازم تعمله مش عشان عايزة تكون جنبي، بس بعدها اكتشفت انها بتحبنى و انى لسة بحبها بس مينفعش نرجع. و لا أنا حبيت بعدها ولا هى حبت بعدى” -ك.ح، رجل، ٢٤ سنة

“كنا خايفين نبين ضعفنا لبعض و بقى كل واحد يخبي جواه و ميقولش للتاني عشان ميضايقش او عشان ميبقاش نكدي، المسافة البعيدة بينا خليتنا نقدر كل دقيقة قضيناها سوا فمكناش حابيين نضيع وقتنا فى وجع بيروح أول ما نشوف بعض بس مع الوقت اكتشفنا إن عدم مشاركتنا لوجع بعض، بعد بينا كتير لدرجة اننا بقينا اغراب عن بعض” -ن.ا، بنت، ٢١ سنة

“ديانتها كانت مختلفة عن ديانتى و بعد ٨ سنين حب و معافرة أهلي قرروا ينهوا قصتنا فسبنا بعض” -ع.ع، رجل، ٢٤ سنة

الحب هبة من عند ربنا، مش مسألة حسابية، لو بتحب حد قوله قبل ما يعدي الوقت و تندم، حاول مرة و اتنين و عشرة لو اللى قدامك يستاهل، اختار صح و حاول تتجنب اخطاء غيرك، الفراق كلمة صعبة و التغلب عليها اصعب، ففكر كويس قبل متأخد اى خطوة.

Comments