عايزين نبطل نقول عايزين

عايز/ه الكلمه ديه لما بتتقال في اي موضوع غالباً الحاجه ديه مبتحصلش عشان في الاغلب برضو مفيش اي خطوة بتتم. عشان اللي عايزة ده يتم او يحصل لازم تتعب عشان توصله و في الأغلب هنا رغبتك بتتحول ل طبطبه علي نفسك زي ان شاءالله بتاعه الحج او الحاجه لما تطلب منهم أي حاجة.
 اللي هو عايز انزل الجيم بقي ونبقي healthy people ونعمل فورمة الساحل بقي, فبتروح وبتدفع اشتراك الجيم ومبتروحش او بتروح بتتهان اول اسبوع ف تمحي الفكرة وترجع للانتخه تاني. أو عايز تظبط خروجة مع صحابك فتفضلوا أيام تظبطوا علي الwhatsapp و في معظم الوقت مبتنزلوش.. قيس علي ده كمية أحلام عندك مبتحصلش عشان بتبقي مجرد عايز.
عايزتاخد كورس اياً كان ايه, انت دايماً عايز تاخده ومبتخدوش, ده الكورس طبعاً
عايزة تعملي دايت ومبتعمليش ولو عملتي شويه وبترجعي تنتقمي تقريباً انك سبتي الاكل عشان عايزة تعملي دايت..
عايز تبطل سجاير عشان صحتك طبعاً وعشان السجاير غليت فبتاخد ياريت سيجارتك وكبايه شاي وتبدأ تفكر في موضوع التبطيل ده و الأتجاه للvape عشان ريحتها أحلي و أنضف بصراحة.
عايز أحوش, أشتغل, ابطل شتيمة, اتحمل مسئولية, مفوتش صلاة…  أياً كان اللي انت عايزه, مش هتوصله بمجرد “عايز”.
 دول تقريبا اكتر الحاجات اللي دايما الناس عايزها ومبتعملهاش وعشان برضو نكون متفقين ان في ناس كتير ربنا بيقدرها وبتعمل الحاجات ديه عادي ودول علي وضعهم الصراحة..
الناس دي عدت مرحلة “عايز” و بدأت تعمل بقي, اللي خصص وقت للجيم و اللي دور علي شغل و اللي اخدت قرار ان من انهاردة انا هبدأ اخس و اللي بطل سجاير, الناس دي مش “عايزة”, هما عملوا فعلاً.
عاش والله يا جماعة, أنا شخصياً عايزة اعمل زيكوا!

Comments