ازاي ممكن حاجة صغيرة تغير حياة انسان

مهند كان نازل رايح امتحان، طريقه في العادي بياخد تلت ساعة.. بس وهو في الطريق اتزحلق ووقع عالارض بسبب ان أم محمد البوابة كانت بتمسح السلم، وهدومه اتبهدلت.. راح امتحانه متأخر لأول مرة وضاع عليه انه يكون اول الدفعة عشان ياخد المنحة .. خدها أحمد صاحبه بداله وسافر .. اتجوز وخلف هناك، ابنه شادي كبر وبقى طايش جدا .. كان في مرة سايق بسرعة خبط مونيكا وماتت .. البنت الوحيدة لأمها اللي ما صدقت انها جابتها .. دخلت في دور اكتئاب وانتحرت ..

طيب لو مكنتش البوابة مسحت السلم في اليوم ده .. مش كان يمكن مونيكا ومامتها يفضلوا عايشين ؟ هو أه مسح السلم حاجة بسيطة اوي .. بس كانت السبب في موت شخصين في مكانين مختلفين تماما .. وهو دي ببساطة نظرية ال Butterfly Effect

بتقول إيه النظرية دي ؟

بتقول إن إعصار ممكن يحصل بسبب حاجة صغيرة جدا .. حروب بتقوم وناس بتموت وكل ده ممكن يبقى حصل بسبب حاجة حصلت في الاول خالص تأثيرها زي تأثير الفراشة .. اللي هو يعتبر ولا حاجة .. حاجة كدة شبه توفيق و الدكتور طارق.

الموضوع ده هيخلينا نتكلم عن نظرية ال ( What if ) ، أو ممكن نقول ال ( Parallel Universes ) .. في القصة البسيطة اللي فوق، كان هيحصل إيه لو أم محمد مكنتش مسحت السلم ؟ طب مش يمكن القصتين حصلوا بس في عالمين متوازين ؟ يعني ببساطة ممكن يكون في العالم اللي احنا فيه أم محمد مسحت السلم وبالتالي في الآخر مونيكا ماتت .. وفي عالم تاني موازي مهند راح بدري وخد المنحة وسافر وعاش حياة مختلفة تماما ..

فيلم Mr. Nobody بيتكلم عن ال Parallel Universes بطريقة حلوة جدا It’s highly recommended

أما بقى لو شايف إن الموضوع صعب يكون تأثيره كبير، فأنت لازم تسمع الحكاية دي؛

كان في عصابة في صربيا عايزة تقتل ولي العهد النمساوي لما كان بيزور سراييفو .. المهم إن العصابة فشلت بس كان في واحد منهم اسمه Gavrilo Princip واقف بياكل في محل كدة وبالصدفة سواق موكب ولي العهد عدى بالغلط من الشارع اللي فيه المحل ده .. راح Gavrilo مطلع مسدسه وقتل ولي العهد النمساوي ومراته .. النمسا ساعتها أعلنت الحرب على صربيا .. ألمانيا تسكت ؟ لاء إزاي راحت ضربت في بلجيكا لوكسمبورج.. راحت بريطانيا أعلنت الحرب على ألمانيا .. وبدأت الحرب العالمية الاولى .. ملايين ماتوا ودول خربت وكل ده بسبب ان Gavrilo كان جعان والسواق غلط في الطريق .. حاجة بسيطة أدت لحرب !

وأخيرا .. متستقلش بالحاجات البسيطة اللي بتحصل حواليك لأنها ممكن تغير حياتك.. احترم التفاصيل الصغيرة والصدف الغير متوقعة .. كل ده ممكن يكون السبب في بلاوي كبيرة اوي هتحصل .. ربنا يستر !

Comments