ليه بتصدق الكلام كل مرة؟

أحمد زكي -الله يرحمه- في فيلم اضحك الصورة تطلع حلوة قال ” كلمة بحبك عقد، اللمسة والنظرة عقد، الوعد بالجواز ده أكبر عقد “.

مشكلة الوقت اللي احنا عايشين فيه ده؛ هي إن الكلام بقى رخيص وملوش قيمة.. علاقات كتير بتقوم على أساس الكلام وبس.. من غير أي أفعال تدل على إن الكلام ده حقيقي .. الحب والصداقة والوعود والطموح والأحلام حتى الأمل بقوا مجرد كلام.. بنستعجل ونصدق الكلام ونجري وراه ونبني حياتنا وعلاقتنا عليه وفجأة بنقع من سابع سما لسابع أرض لما نشوف الواقع، لما الأفعال تبدأ تظهر وحقيقة الكلام الهش تبان .. و ده سبب فشل علاقات كتير جدا .. تلاقيها بتقول ” بس هو قالي إنه بيحبني ” أو ” بس هي قالتلي إنها مش هتسيبني ” أو ” بس هما قالولي إنهم هيفضلوا ” .. كل الجمل دي فيها شئ واحد بس مشترك، إنهم مجرد ( قالوا ) وانت صدقت .. هما معملوش اللي يثبت ده .. وفأول اختبار عرفت حقيقة الكلام

طب ليه بنصدق ” كلام ” ؟

المشكلة ممكن متبقاش في الكلام على أد ما هي في تأثير حاسة السمع علينا .. إحنا لما بنسمع، بنتخيل.. وبنرسم عالم كامل يمكن ميبقاش غير في خيالاتنا إحنا بس .. وهنا المشكلة .. بتعظم الشخص اللي قدامك من مجرد كلام .. وتعيش متخيل إنه هيعمل وهيسوي وهيقدملك كل شئ ممكن يتقدم .. بس في الواقع إحنا بشر، قدراتنا بسيطة وطاقتنا بتخلص مع الوقت.. ممكن لما قالوا ال ” كلام ” كانوا مستعدين يعملوه بس دلوقتي لاء.. وممكن فعلا يكون من الأول مجرد ” كلام “.

عشان كدة متورطش نفسك في أي علاقة إلا لما تشوف بنفسك الشخص ده ممكن يعمل عشانك إيه .. خد وقتك كله ومتستعجلش .. فكر مرة واتنين وعشرة .. احسبها بقلبك اه .. بس اسمع لعقلك .. عقلك بيشوف أحسن وبيفكر بمنطقية أكتر .. حتى وإن كان الحب هو أكبر شئ مفيهوش أي منطقية .

Comments