الحب من نظرة أخري

أوقات كتير بنسأل نفسنا، يعني إيه حب؟ الإحساس إللي بنتمني نلاقيه، و أوقات كتير أوي بنتمنى انه ينتهي. بس عمرنا ما بنفهم، عمرنا ما بنعرف امتى و ازاي أو ليه ده حصل؛ بس الأكيد إنه أقرب حاجة لحلم نفسك توصل له، و أبعد بكتير من إنك تتخيله.

“ﻛﻞ ﺍﻷﺷﻴﺎﺀ ﺗﺼﺒﺢ ﺃﻭﺿﺢ ﺣﻴﻦ ﺗﻔﺴﺮ، ﻏﻴﺮ ﺃﻥ ﻫﺬﺍ ﺍﻟﻌﺸﻖ ﻳﻜﻮﻥ ﺃﻭﺿﺢ ﺣﻴﻦ ﻻ ﺗﻜﻮﻥ ﻟﻪ ﺃﻱ ﺗﻔﺴﻴﺮﺍﺕ.” — جلال الدين الرومي

الحب جميل و لا مُتعِب؟ بيوجع، ولا بيخفف وجعنا؟ بيحلي الحياة في عنينا و لا بيزود من مرار الأيام و يصعبها؟ الغريب، إن كلمة واحدة و إحساس واحد جواه معاني و أسئلة كتير و أحاسيس ملخبطه؛ و عمرها ما بتوصلَك لحاجة معينة. يعني لو سألت خمسة تعريف الحب بنسبالهم إيه، كل واحد هيقول إجابة مختلفة عن التانية و فيه اللي مش هيلاقي إجابة أصلاً. بس اللي أكيد، إن الحب هو “كل حاجة”.

“أنت هدوءُ قلبي وصخبهُ في آنٍ معاً.” — فرانز كافكا

الحب بيحسسك بنشوة و سعادة تخليك طاير و نفسك الإحساس ده ميخلصش، و في نفس الوقت، عنده القدرة يسحب من جواك النفس إللي داخل و يخنقك. إزاي “شعور” يكون ليه قوة وسيطرة كبيرة أوي كدة؟ بيتحكم في عقلك و قلبك و كيانك و حتي طاقتك بيخلصها و يبعزقها، و يشحنها تاني و تالت و عاشر. إزاي الشعور اللي بنحلم نحسه و يبسطنا انبساط رهيب، يكون هو هو نفس الإحساس اللي يوجع و يكسر و يطفي لمعة العين ويحولك لشخص تاني مش قادر تعيش معاه.

“لا تفكر أنك تستطيع أن توجه الحب في مساره فالحب إن وجدك جديراً به هو الذي يوجه مسارك.” — جبران خليل جبران

حتحب و قلبك هيتكسر، حتاخد النفس بصعوبة و تخرجه بصعوبة .. و حتحس إنك مش هتقدر تكون كويس تاني. بس في كل مرة حتوعد نفسك فيها إنك مش هتسيبها تدوب جوا الإحساس ده، قلبك حيخونك و حيستسلم مع أول إشارة. مش عشان مش بتتعلم، بس عشان ببساطة إنت بني آدم، و مش هتقدر تخلي قلبك يعوز حاجة تانية غير إنه يتدفي جوا الإحساس ده و إنك تعيش و تحس تفاصيله بالمللي. و برضه، هتبقي اسعد واحد في الدنيا، عشان حبيت .. واتحبيت.

Comments