إزاي تخلي البنات تحبك؟

في دَخَلات كتير عند الولاد لما بيحب يكمل نص دينه أو يجرب حظه مع بنت .. الشقط عامةً بيرجع لمدى قدرة الولد على تشغيل دماغه ومدى سذاجة البنت .. الموضوع بيبقى صعب لو كانت البنت على دراية بمعظم ” دخلات الولاد ” .. وكل ما كان الولد creative في دخلته كل ما كانت الدَخلة ناجحة وبيتم اعتمادها رسمياً.
الدخلات المشهورة اللي مازالت ” بتجيب ” مع بعض البنات أمثلتها كتير .. زي إيه ؟
1. تيجي نصوم شهر رمضان زي ما وصانا ربنا؟
لو كانت البنت متدينة مثلاً.. بيحشر بين كلامه معاه أي شئ ليه علاقة بالدين “أنا نازل أصلي”، “يلا نصلي الفجر”، “يلا نقرا سورة الكهف”، “يلا نصوم يوم التلات”، “تعالي عندي نذكر ربنا” .. وطبعا البنت المتدينة هتحب الكلام ده جداً و هتشوف فيه نصها التاني و هتبدأ ترتب فرحها و ممكن تناديه ب”زوجي”
2. المرأة بمليون مرأة قوية
أما لو كانت البنت متحررة.. هيحاول دايماً يبان قدامها أكثر تحرراً، ويساعدها على تحررها ده ويشتم في المجتمع الرجعي السطحي المنغلق اللي مبيديش البنات حقها، ويبدأ يقول كلام من نوعية ” المرأة نصف المجتمع”، “المجتمع نصف المرأة”، النصف مجتمع المرأة”، و ممكن ينضم لمنظمات حقوق المرأة اللي معظمها رجالة تقريباً.
3. بنت قلبي ♡
أما لو كانت عميقة.. هيبدأ يقرأ quotes لجلال الدين الرومي وشمس التبريزي ويشرب قهوة سادة ويصورها جنب رواية إنستا حياة ويكتب جنبها ” صباح الحب ♡ ” اه وبيعمل قلب كدة جنبها، تبدأ هي تسأله ” انت بتقرأ ؟ ” يرد عليها بكل ثقة ” طبعاً ” وبينطلق في سرد سلسلة لا نهائية من اسماء الروايات اللي ميعرفش عنهم حاجة غير النهاردة الصبح وربنا يخليلنا Google و Goodreads
4. العلم ثم العلم
طيب لو كانت متفوقة دراسياً ؟
النوع ده بيتطلب منه – للاسف – شوية إلتزام بالـlectures والـattendance وتسليم الـAssignments عشان الـnerd تحب الـnerd اللي زيها.
في بقى دخلات ليها أسامي .. زي دخلة الـ “إيه ده بجد! أنا كمان ” اللي فيها بيشوف هي بتحب إيه ويقولها أنا كمان.. يشوفها بتعمل ايه ويقولها انا كمان فهتبدأ تحس انهم متشابهين
و دخلة ” الشهامة ” و ” الرجولة ” و ” الخوف عليها ” و ” اللزقة ” و ” الغير مبالي بالحياة ” و ” المكتئب ” …إلخ
 
كل الدخلات دي لو ” دخلت ” عليكي إعرفي إنك ساذجة لأن غالباً ده بيكون تمثيل و مع الوقت بتظهر شخصيته الحقيقية و بتبدأ معاها المشاكل، ولو مدخلتش عليكي خليكي جاهزة لأنه قاعد دلوقتي بيcreate new one وربنا يستر!

Comments