بكري خالد: رحلتي من الطب لأبو حفيظة

من الراديو لأبو حفيظة, لقواعد القطة الأربعون, للويك إند بعد التلاتين, قابلنا بكري خالد قباقيبى اللى حبينا نتعرف عليه اكتر!

بدأت ازاي؟

ابتديت من زمان أيام الجامعة, أنا خريج business قسم marketing, كان نفسي أكون حاجة في الmedia خصوصا الكوميديا, كنت بعمل في الأول حاجات ضمن نطاق صحابي, و اما حبيت اكبر الموضوع لقيت نفسي بشتغل مذيع راديو في إذاعة اسمها ديابfm, و قدمت برنامج اسمه the show و دياب اكاديمي.

اصعب قرار اخذته؟

أنا كنت فى كلية طب 3 سنين بعدين قدمت فى مسابقة Melody Hits و أنا فى الطريق رايح امتحان final, لاقتهم بيكلموني يقولوا لي ان تم اختيارى و عايزيني فى القناة دلوقتى, و كان لازم اختار بين الامتحان و تقديم البرامج, و ساعتها قولت للتاكسي يطلع بينا على الزمالك عشان اروح المحطة, و بعدها حولت و درست business و اتخصصت فى الmarketing

احكيلنا عن تجربتك مع ابو حفيظة!

كنت بعمل فيديوهات انا و جيلان زميلتي, و بالصدفة أكرم حسني شاف الفيديوهات و بعتلنا قالنا انه بيعمل مسلسل و عايز ممثلين, مكنتش متخيل ان ممكن اكتب, و اما حاولت في الاول معرفتش بعدين بدأت اكتب في اسعد الله مساءكم عشان حبيت شخصية ابو حفيظة و بدأت الناس تعرفني من اسعد الله مساءكم.

لو قالوا لك تختار بين التليفزيون و الsocial media, تختار ايه؟

نفسي اكمل في التلفزيون طبعا رغم ان فعلا الsocial media هي اللي طلعت ناس كتير, بس انا حابب التليفزيون اكتر.

درست تمثيل؟

آه جربت مرة بس مقدرتش اكمل

ايه اللى بيسعد بكرى؟

أنا فعلا بتبسط لما بضحك الناس, و لما الاقي ناس ناس داخلة تقولي انا كنت مضايق و مزاجي اتغير لما شوفت الفيديوهات بتاعتك.

ايه أغرب تعليقات شوفتها على الفيديوهات بتاعتك؟

أنا دايماً برد على كل الcomments, فى واحدة كل فيديو تكتب لى يا سخافة دمك, فدخلت قولت لها حضرتك ممكن تدخلى تعملي unfollow عشان باقة حضرتك, و ده لاصحاب الباقات الضعيفة, و كذا حد بيجي يسألني انت حاطت روج ولا ايه؟

فكرة الويك اند بعد الثلاثين جاءت لك ازاى؟

موخراً بقيت قاعد في البيت أو علي القهوة يوم الخميس عشان كل صحابي اتجوزوا, فكتبت مرة post اني من كتر الملل قربت اعمل تريكو, لقيت الناس تفاعلت جدا مع البوست, مسكت الموبايل و عملت فيديو من غير script و الناس حبته جدا!

ليه متجوزتش لحد دلوقتى؟

النصيب لسه مجاش, انا مش عايز واحدة نكدية, ظروف الحياة و الضغوطات خللت الواحد مش مستحمل, يعنى مثلا مخرجهاش فى مطعم و ألاقيها بتقول الأكل وحش و المكان وحش اوى و كدا.. لكن انا لو لاقيت واحدة كويسة ليه متجوزهاش؟ انا مش لسه صغير هاخطب و نمسك ايد بعض و الكلام دا يعنى لازم انجز!

انت مع ولا ضد ان الواحد يعمل فرح؟

هو الفرح بالنسبة لي مش مهم بس عارف البنت بتحب كدة فمينفعش اني اضيع لها اليوم و خصوصا اهلها عايزين يفرحوا بيها لكن مبهرجش يعنى اعمل فرح و الناس تفرح بس ممكن اعمله فى حاجة بسيطة الصبح مش لازم احجز قاعة مليون شخص و 14 ديك رومى مبحبش الافورة

ايه حكاية محمد عمرو و محمد مجدى؟

محمد عمرو و محمد مجدي دول بيمثلوا الاشخاص اللي بتبقي قاعدة في أول الفصل و آخر مرة بنشوفهم في امتحانات الثانوية العامة و محدش عارف بيروحوا فين! هما مش اشخاص حقيقية خالص.

مين اللي متابعهم علي السوشيال ميديا؟

مروان يونس, عمرو وهبه, تميم يونس, و فيديوهات arab vines, بيشدني حاجات كتير بس مش شخص معين اد فكرة الفيديو نفسه.

تعمل برنامج و لا تمثل؟

انا عندي هدف و هو اني اكون كوميديان, سواء في برنامج او افلام , لكن في المرحلة دي مينفعش اختار اوي, لو قدامي فرصه هعملها و هحاول اعملها كويس, لكن لو هتضرني مش هعملها, لازم ابدأ خطوة خطوة بس نفسي امثل جدا و ادوار جد كمان, نفسي اجرب, و ناس كتير بتقولي ان ملامحي تساعدني اني امثل ادوار جد!

Bakri
لازم تعمل ادوار جد بعد الصوره دي يا بكري

لو قولنا لك احلم من غير اي حسابات, نفسك في ايه؟

نفسي اكون زي Jimmy Fallon بيقدم برامج و بيمثل و بيعمل Stand-up comedy

هل فيseason جديد لابو حفيظة؟

آه فيه احنا بنصور دلوقتى 7 حلقات من اصل 15 حلقة و هنكمل بعد رمضان ان شاء الله.

سواء فيديوهات علي السوشيال ميديا, التليفزيون, او حتي التمثيل في السينما, بكري خالد قباقيبي من الناس الموهوبة اللي لازم تكمل و تكبر, اوعي تحط حدود للي نفسك توصله عشان قاعدتنا معاه خليتنا متأكدين انك هتقدر توصل لحلمك زى ما احنا متاكدين ان بكرى خالد هيبهرنا اكتر فى المستقبل!

Comments