رمضان 2017: توقعات مسلسلات السنة دي

رمضان جانا, أو جاي اهو يعني.. الشهر ده كمصريين بنستناه من السنة للسنة عشان عاداتنا هنا غير أي مكان تاني. العيلة بتبقي ألذ و خروجات الصحاب بتبقي مختلفة و الأكل بيبقي أطعم و التلفزيون ده الموسم بتاعة بقي! جبنالك شوية معلومات دة عن اللي نجومنا محضرينه السنة دي, ركز عشان هتحتاج مهارة عشان تظبط وقتك و  تتابع الحلو بس من الحاجات دي..

عفاريت عدلي علام

adel

من الواضح إن الزعيم بعد عن شخصية كبير العيلة السنة دي وعمل شخصية كاتب بيحرك الرأي العام و عامل مشاكل. بيشاركه في العمل غادة عادل و هالة صدقي و الجديد عودة أطيب واحد في السينما المصرية الفنان كمال أبو رية! كالعادة المسلسل هيتعرض علي MBC و MBC Masr  بس عشان في حاجات مبتتغيرش كلنا عارفين.

الزيبق

4تفاصيل-مسلسل-الزيبق-لكريم-عبد-العزيز-في-رمضان-2017

كريم عبد العزيز و شريف منير ثنائي اثبت نجاحه و تناغمه في فيلم ولاد العم اللي كسر الدنيا و كان بيتكلم علي المخابرات فقرروا يتجهوا للتلفزيون و يمثلوا قصة من ملفات المخابرات المصرية في رمضان متبعين مبدأ اللي تعرفه أحسن من اللي متعرفوش.

اللهم إني صائم

a88c8d3d-c38e-4641-98ae-ae92de05f0f1

أهو أقرب مثال للحاجات اللي مبتتغيرش. مصطفي شعبان نازل السنة دي بمسلسل جديد بس مش جديد قوي يعني هيلبس فيه قفطان و يسبح , و يعرف/يحب/يتجوز/يخلف ستات كتير.. مش مهم هو هيعمل إيه, أهم حاجة الستات الكتير. المسلسل فيه ماجدة زكي و مي نور الشريف. تحس روح الحاج متولي بتحوم حوالين الlocation كدة.

لأعلي سعر

139965_details

زي ما عودتنا الجميلة نيللي كريم إن ميعديش علينا رمضان من غير عياط و اكتئاب و قطع شرايين.. إيه؟ نيللي مش عاملة دراما؟ أحمدك يا رب! نيللي رضت علينا و شاركت زينة و أحمد فهمي و أحمد مجدي و عدد مهول من النجوم في مسلسل بيدور حول بنتين بيلعبوا بالية و بإذن الله مفيش اكتئاب السنة دي.

30 يوم

25352-17499579_990343671065912_2439533989402281354_n

آسر ياسين بيحضر دور دكتور نفسي السنة دي و معاه في المسلسل باسل الخياط, و بكدة يبقي آسر استلم راية الإضطربات النفسية من نيللي كريم و غادة عبد الرازق و يسرا اللي كانوا كلهم ماسكينها رمضان اللي فات وبقي بسيكياتريست السنة.. طبعاً عارفين البنات علي كل مواقع السوشيال ميديا هتكون بتتكلم علي ايه السنة دي.

الحصان الأسود

maxresdefault (6)

من اسمه كدة لايق علي أحمد السقا! اكتر واحد بيحب الأكشن و الحصنة في مصر راجع السنة دي و غالباً هيكون ظابط أو أخو ظابط أو صاحب ظابط أو بيكره ظابط، يعني اكيد هيكون في دور مهم و كبير لأي حد يمثل وزارة الداخلية حتي لو عسكري أمن مركزي و الدور ده فاز بيه ظابط العمل محمد فرّاج. أهمية الظابط حتي لو القصة مش بتدور حوله من سمات مدرسة الفنان أحمد السقا.

حلاوة الدنيا

20281710441484133943

هند صبري لقت ملعب الدراما فاضي فقالت تنكد علينا بدور واحدة اكتشفت إن عندها سرطان قبل فرحها. ليه يا هند؟ راحت فين أيام الفرفشة و عايزة اتجوز؟ الحق يقال يعني ممثلة بحجم و موهبة هند و وجود ظافر العابدين مبشرين جداً بالمسلسل ده و غالباً هنكون قدام عمل فني هيعلق معانا لفترة كبيرة.

الحرباية

haifa-1-3

هيفاء وهبي بتشتغل عند تاجر مخدرات.. مسلسل عمل مشاكل و قلب اسكندرية من و هو لسة بيتصور. يلا اللهم إننا هنكون صايمين.

الجماعة 2

306a64f9-994c-4ace-99af-7b105272a359

الجزء ده هيكمل حكاية جماعة الإخوان المسلمين و تاريخهم. الأكيد إن هيكون في جدل كتير و أخبار اكتر علي المسلسل و هتلاقي مؤيدين و معارضين و مشاكل كتير بس فكرة إن وحيد حامد اللي كاتبة بتضمن اننا هنكون قدام عمل كبير.

كفر دلهاب

yshreiiiif2

الرعب من الحاجات اللي ملهاش حظ قوي في الدراما المصرية و في اغلب محاولتنا الرعب قلب كوميدي, بس يوسف الشريف قرر يغيرالنظرية دي في رمضان بكفر دلهاب اللي بيدور حول قصة قرية مسكونة من قصص ألف ليلة و ليلة.

خلصانة بشياكة

b511eda34aa554d4a1029229c4c8a491_920_420

أحمد مكي أخيراً راجع بشخصية غير الكبير. شغال في خلصانة بشياكة مع شيكو و هشام ماجد، الثلاثي ده عنده طاقة يطلع كمية ضحك تخلينا نتخطي اللي هند صبري عملته فينا ده.

هو و هي و هو

2016_10_16_16_3_28_480

أكرم حسني كمان بدأ يظهر بشخصيات غير أبو حفيظة و بعد ما نجح في بنك الحظ شغال رمضان ده علي هو و هي و هو مع أحمد فهمي. فهمي صرح إن اسم المسلسل ممكن يتغير, بس أيا كان اسمه يعني دي مش أول مرة نشوف فهمي و أكرم و كل مرة بيبهرونا فا متوقعين حاجة كويسة من المسلسل ده.

طبعاً في ناس زي غادة عبد الرازق و دنيا سمير غانم و غيرهم شغالين علي أعمال السنة دي, ده ميجيش واحد علي ألف من المنتظر رمضان ده و الأيام اللي جاية هيظهر تفاصيل أكتر, خلينا نشوف المسلسلات رايحة علي فين!

Comments