اسوأ ١٠ شخصيات ممكن تقابلهم فى حياتك

الناس أنواع و كل نوع فيه عيوب و مميزات, إحنا مش هنا عشان نحكم علي بعض, الفكرة إن في شوية عيوب كدة لو زادت غصب عنك بتبعد الناس عنك…من الاخر كدة انت هتبقى عدو نفسك هتضر نفسك اكتر ما تفيدها.. عندك مثلاً

١-بتاع مصلحته:

دا اللى هو يلا نفسى، عايز الكون يمشى على مزاجه و لازم يطلع منك بمصلحة يأما مش هيضيع وقته معك.. يخرج معك تعزمه، تعرفه على حد مهم بالنسبة لك تانى يوم تلاقيه خارج معه و مش قايلك.. من الاخر كدا مبتسلمش من خوازيقه

٢-اللى يهون عليه العيش و الملح:

 اول ما تقع فى مشكله و تلف وراك تستنجد بيه تلاقيه هو اللى عملك المشكلة اصلا.. مهما قضيت معه وقت حلو و استجدعت معه دايما هتلاقيه مستندل معك و بيتكلم عليك مع اى حد يقابله

٣-الjudgemental:

 دا يعتبر من اسوأ الناس اللى ممكن تقابلها فى حياتك و خسارة تدخل فى مناقشة معه و تضيع وقتك لانه ببساطة ميستاهلش.. دا اللى بتلاقيه ماشى يقولك البت ديه شمال مش شايف لابسه اية و الواد ده حرامى و الواد ده شمام اصل شوفته فى يوم دايخ و هكذا بقى… ده اول ما تتعرف عليه تقطع معاه فورا

٤-اللى مفيش احسن منه:

اللى هو انا جامد بس، انا بفهم فى كل حاجة و كلكم بهايم ولا بتفهموا فى اى حاجة، انا بلبس احسن حاجة و انت زبالة بالنسبة له .. دا تقريبا بيكون عنده عقدة نقص من صغره.

٥-الغبى:

ده لازم تشرحله الحاجة فوشخوميت مرة و برضة مبيفهمش! فخسارة تضيع وقت معاه بس غالبا بيكون غلبان و طيب

٦-الساذج بزيادة:

ده منغير ميحس تلاقيه موقعك فى مليون مصيبة!! مش بياخد باله هو بيقول اية و من طيبته بيفتكر كل الناس زية و فى الاخر بتلبسوا انتم الاتنين.. مشكلة الشخص ده انه مبياخدش موقف دايما سلبي كدا و فى المشاكل و المواقف الجد متلاقيهوش

٧-الattention seeker:

 انا هتكلم و خلاص! اى موضوع اى مشكلة حاشر نفسه فيها و هو لازم يتكلم و الباقى يسمع قصصه العظيمة اياك تفكر تفتح بوقك معه عشان مهما عملت فالmic معه هو و مش هيسكت ولا هيديك فرصة تتكلم

٨-البيفطس اى فكرة حلوة:

مهما قلت له على حاجة حلوة سواء خروجة، سفر او حتى مشروع لازم يفطسهولك و يطلعلك فيه القطط الفاطسة

٩-المبيسمعش:

ده فيه شوية من الattention seeker اللى هو اى موضوع تحكيه لازم يتقلب و فاجأة تلاقيك عمال تسمع فى قصصه و حواراته اللى مبتخلصش

١٠-المحوراتى: 

لو محطش الtouch بتاعه فى  أي حاجة بيحكيها يبقى فى حاجة غلط.. اللى هو حصل خناقة عشان عربيتين خبطوا فى بعض، هو بقى يقولك طلعوا السيف من تابلوة العربية و التانى راح مخرج موتور العربية خبط بيه دماغ التانى و هكذا بقى

اللى بتجمع فيه كل الصفات اللى فوق ديه أحسنلك تبعد عنه و يا ريت هو يريح البشرية منه و يحاول يشتغل على نفسه و يبطل العادات السيئة ديه عشان حقيقي الناس مش مستحملة

كلنا فينا الصفات دية بس بنسب مختلفة و كل ما قلت او اختفت كل ما كان افضل حاول على اد ماتقدر تكون متواضع و لطيف مع صحابك  عشان متلفش فجأة و متلاقيش حد فى ظهرك ؛)

Comments