البنت فى مصر اصبحت ملكية عامة

في خلال الكام اسبوع اللي فاتوا, حصل حادثتين تحرش ابشع من بعض -دول اللي سمعنا عنهم, و ما خفي كان أعظم-.. الحادثة الأولي كانت تحرش جماعي في الشارع ببنت, شارع كامل اتجمع علي بنت عشان شايفين فستانها قصير, أما الحادثة التانية كانت واقعة اغتصاب طفلة لا يتعدى عمرها الثلاث سنوات و اللي فاجئنا هو شبه تعاطف  القاضي مع الجانى..

معلش انتم متوقعين ان البنات تطلع متدلعين و مش مسترجلين على اساس اية؟ بجد نفسي افهم عشان التريقة علينا كترت اوي .. احنا لا عايزين نبقى اقوياء ولا ننافسكم, بس اللى بنشوفه و بنضطر نواجهه فى حياتنا يوميا هو اللى خلانا كدة عشان نقدر نعيش… البنت بتدخل الحضانة او المدرسة و هى صغيرة و بيتم استغلالها و التحرش بيها منذ طفولنها  و هى متعرفش اصلا الفرق بين الولد و البنت غير انها مجرد ألقاب .. سواء بقى الاستغلال دا بيحصل من مدرس او من اصحاب العائلة او من العائلة نفسها… بعدين تبدأ يبقى عندها وعى و تتمرد فى سن المراهقة و تفتكر انها كبرت و تحب واحد زميلها او اخو صاحبتها اللى يبدأ برضه يستغل مشاعرها جسديا و جنسيا لارضاء غريزته بعدين يسيبها و تبدأ تواجه الحياة بقى طول ما هى ماشية فى الشارع او رايحة او جاية من حتة اى شخص يعاكسها او يتحرش بيها جسديا سواء فى الشارع او فى اى وسيلة مواصلات على اساس انها اصبحت ملكية عامة للرايح و اللى جاى اى حد يخبط فيها للدرجة اللى تخليها تكره عيشيتها و تكره ان ربنا خلقها بنت لان فى اغلب الحالات مبتعرفش تجيب حقها او تلاقى حد يقف جنبها و يدافع عنها لدرجة انها بتبدأ تحس ان اللى حوليها متخدرين و ان دا عادى و طبيعى و المفروض تتعايش معه

للاسف اللى مكتوب دا مش حالة فردية.. الموضوع منتشر اكتر ما انتم متخيلين.. الناس اتكلمت علي هاشتاج  و للأسف الحقيقة أكثر رعباً من الخيال

IMG_9717 IMG_9718 IMG_9719 IMG_9720 IMG_9721 IMG_9722 IMG_9723 IMG_9724

الحل مش كلام ولا جمعيات..الحل فى تعليم و توعية و تفعيل عقوبات اكتر من كدة على المتحرشين, بس الاهم من كل ده انك متسكتيش عشان صوتك دايما مسموع … حسبى الله و نعم الوكيل

Comments