ذكري وفاة أسطورة السينما المصرية- أحمد زكي

أي حد هيقرر يكتب او يتكلم عن أحمد زكي, مش هيعرف يبقي موضوعي و بينقل صورة و الكلام ده, أحمد زكي عايش جوانا كلنا, عشان اي حاجه عملها كانت طالعه من وسطنا احنا… الناس, عشان كده مش غريبه اما تلاقي نفسك متلخبط معاه و حاسس بالصراع الداخلي اللي هو عايشه وانت بتتفرج علي يحيي في “أرض الخوف”, او بتعيط عشان صعبان عليك سذاجة احمد سبع الليل في “البرئ”, او قاعد مستمتع بالحوار العبقري بين مستطاع و توالي في “البيضه و الحجر”, مش غريب اما تخاف من هشام في “زوجة رجل مهم”, اللي بالمناسبه روبرت دي نيرو راح لأحمد زكي في مهرجان موسكو اما الفيلم ده اتعرض و قال له “انت ممثل عبقري”, و اما تعرف ان عمر الشريف قال ان أحمد زكي كان ممثل احسن منه و لو كان بيتكلم انجليزي كان هياخد اوسكار.

17361401_1532902040072712_852122775_n

أحمد زكي اللي جالنا من الزقازيق و إتخرج من المعهد العالي للسينما سنه 1970 و كان الاول علي الدفعه, عرف يغير مقاييس بطل السينما, عرف يخلي الناس تركز في التمثيل و الشخصية و الحاله اكثر من شكله و لبسه, و دي حاجه هو وعادل إمام قدروا يعملوها مع بعض في الفترة دي.

كان عامل لقاء قبل كده و قال “أنا بدرس الشخصيه زي الدكتور النفساني, الفرق بين الممثل و الدكتور ان الدكتور بيشخص الحاله و يقفل ملفها و يعالجه, انما الممثل بياخد الشخصيه بكل ما درسه عنها و يلبسها لجهازه العصبي” الجمله دي هي اللي فهمتنا ليه اما بنتفرج له علي فيلم بننسي انه أحمد زكي و مش شايفين غير الشخصيه و بس, و ده واضح اوي مع كتير من الناس اللي اما يفتكروا السادات او عبد الناصر او عبد الحليم, بتيجي في دماغهم صورة أحمد زكي و هو بيجسد أدوارهم.

17391895_1532901756739407_1289231636_n

الكلام ده تقدير لأحمد زكي اللي ذكري وفاته زي انهارده من 12 سنه, و كل سنه لازم نفضل نكتب و نتكلم عنه عشان مفيش جيل ينساه او نيجي في وقت نلاقي حد مش عارف فيلم زي “أرض الخوف”

 اتفرجوا علي الحلقه دي عن الفيلم من برنامج cinematology, واحد من أحسن برامج نقد و تحليل الأفلام اللي موجوده دلوقتي.

 

Comments

SHARE
Previous articleإمتي هتفرق قبل الوداع؟
Next articleThe Golden Fish; Farida Osman
A Mass-communication student who's studying cinema directing and totally passionate about movies that enlighten our souls.