المشكلة فينا و لا فى مين؟

و الله الواحد مبقاش عارف احنا كويسين و لا احنا وحشين

احنا طيبين و لا مستغلين , هل احنا جوانا كان كويس فعلا و الدنيا هى اللى غيرتنا , و لا احنا ما بنصدق نلاقى اقل فرصة عشان نبقى وحشين و نرمى حجتنا على اى سبب

موجة غلاء ؛ تقريبا اسعار كل حاجة فى مصر زادت 100% يعنى الحاجة اللى ب 100 بقت ب 200 و اللى ب 1000 بقت ب 2000 , ماشى اصلاحات اقتصادية , و شروط صندوق النقد و اشياء من هذا القبيل احنا مش جايين نتكلم سياسيا النهردة

احنا حابين نتكلم على نفوس الناس اللى بقت وحشة جدا , كل واحد ما بيصدق يلاقى فرصة عشان يستغل الوضع و يطلع باكتر مكاسب ممكنة , البياع اللى الحاجة واقفة علية ب 10 بيبيعها ب 12 و يقولك م الدنيا كلها غالية يا بيه , تسأل بتاع الفاكهة و الخضار يقولك الدولار غلى !!  تسأل بتاع الشاى و القهوة يقولك الدولار غلى !! هل احنا كشعب منقدرش بنفوسنا و تكاتفنا مع بعض نعدى من الازمة؟

طب حنسيب الناس اللى بتبيع و نرجع للمستهلك , هل احنا عمرنا شفنا الناس قدرت تستغنى عن حاجات اصلا مش استخدام اساسى فى حياتها , عشان بس هى معاها فلوس و تقدر تشترى و تجيب اللى هى عايزاه , تعرف ان انت كدة بتأذى اللى معهوش يشترى , ماهو طول ما السلعة بتتعرض و انت بتدفع و تشترى , طول ما الاستهلاك شغال و الدنيا حواليك مش باين فيها اى ازمة

اكيد كل واحد بيقرى اللى مكتوب ده , كان موجود فى مرة فى منطقة فيها سياح و شاف اى واحد بيبعلهم حاجة و بيبعلهم باسعار عاملة ازاى , و ده كان قبل الغلو مثلا , هل ده سببه ازمة اسعار و لا ازمة ضمير

افتكر لما كنت بنزل لجان شعبية ايام الثورة سنة 2011 , الجيران كانت بتنزل اكل للشباب اللى قاعدين فى الشوارع , البياعين و برغم ان تقريبا كان فيه مشاكل كبيرة فى نقل البضاعة مثلا , الا ان عمرى ما شفت استغلال فى الاسعار و لا ان حد يشيل سلعة لحد ما سعرها يزيد و ينزلها يبيعها عشان يكسب فيها

و لو اتكلمنا عن دور اى رقابة حكومية , او اى تفتيش على الاسعار او توافر السلع , مفيش تماما , و ده مشكلة كبيرة برضه و بتساعد التجار او البياعين يزودوا زى ما هما عايزين , لان هما متأكدين ان المستهلك محتاج و حيشتري

صدقونى بعتذرلكم عن الطاقة السلبية اللى صدرتهلكم , بس هو ده حالنا اليومين دول , مع. ان ده مش احنا , ده مش احنا خالص

Comments