انا strong independent و أخترت صح

“انا Strong independent women و مش محتاجه راجل ” جمله على لسان معظم البنات الفتره الاخيره و تحولت من مجرد موضه لظاهره تستحق ان الواحد يتأملها و يسأل نفسه ليه؟ ليه الكم ده من البنات شايفين ان حياتهم احسن من غير رجاله؟ هل في ربط منطقي بين تحقيق الطموح و بين عدم وجود راجل في حياة البنت؟ و ايه العلاقه بين القوه و الاعتماد على النفس و تحقيق الذات و بين ان حد يقرر يغير طبيعته الانسانيه؟

بنات كتير من اللي أخدت الجمله دي أسلوب حياة بيكون عندهم اسباب..زي هروب من ألم علاقات حب فاشله أو خوف من تكرار التجربه و الفشل فيها مرة تانيه و تقرر تقنع نفسها انها مش محتاجه تجرب تاني و ان حياتها احسن من غير راجل و ده نقدر نسميه “انكار للواقع” هي أختارت تقنع نفسها انها مش محتاجه تجرب تاني ولا محتاجه راجل ولا محتاجه حب، استخدمت ده على اعتبار انه بديل عن انها تواجه نفسها بخوفها و فشلها اللي غالبا سببه سوء تمييز او سوء أختيار ، هي ببساطه دخلت علاقه بقلبها مع راجل حاول بطرق مُختلفه انه يكسر طموحها او يحسسها انها اقل منه او ان مش من حقها تنجح و عقلها أقنعها ان كل الرجاله زيه و ان مافيش راجل هيحب يكون مع واحده ناجحه و شاطره.

فكره التجرد من الطبيعه البشريه هنا غريبه جدا ، بنت ربنا خلقها بالفطره مشاعرها بتتحكم فيها و خلقها ب اقوى غريزة ف الدنيا اللي هي غريزة الأمومه ، ازاي تقرر فجأة انها ولا محتاجه المشاعر دي تتوجه لشخص ولا محتاجه تبقى أم ؟ مش من المنطقي ان الحل الوحيد اللي شايفينه علشان نحافظ على قوتنا هو اننا نتخلى عن جزأ من طبيعتنا غير انها لحظة اتخاذ قرار انها تكمل حياتها لوحدها غالباً بتكون بتفكر في حل لحظي يطمنها و يسهل عليها عناء المحاوله في اي علاقه تانيه ، بس مش بتفكر لقدام، مش بتفكر هي هتقدر تعيش كده فعلا ولا لا؟ طيب هل هي فاهمه و شايفه نتائج القرار ده كامله ولا لسه عايشه في حاله الأنكار؟ في اللحظات اللي زي دي كلنا بنقص الصوره الكامله و بناخد منها اللي يريحنا و يسهل علينا اتخاذ قرارات في اغلب الاوقات بنندم عليها لما بيكون فات وقت الرجوع.

اكتر حاجه غريبه هنا هو الربط بين الجملتين و خلق علاقه عكسيه بينهم..طب ليه مش بنفكر نبقى الاتنين؟ strong indepent و بحب؟ او متجوزه او مرتبطه! في ستات كتير قدرت تنجح في شغلها و دراستها و حققت طموحها و كان في حياتهم رجاله عادي..اه في رجاله كتير بتخاف من نجاح الست..بس اعتقد ان الست الذكيه عمرها ما تختار راجل غبي و الراجل الغبي بس هو اللي بيخاف من الست الناجحه..المشكله مش ان في تعارض بين الجواز و تحقيق الذات، المشكله في اختيارتنا احنا..احنا اللي احياناٌ بنفقد توازن بين القلب و العقل و بندخل علاقات يمكن مع اشخاص غلط و بنحكم على كل العلاقات بعد كده بنفس المقاييس اللي اصلا مش صح و أثبتت فشلها و بعد كده خوفا من تكرار الخطأ بدل ما نوازن بين القلب و العقل بنقرر نوقف القلب خالص..و نقول ان مافيش راجل هيحب النجاح لست..مع ان الواقع بيقول ان فيه امثال كتيره لستات ناجحه جدا و أزواجهم هم أول سند ليهم و اول ناس بتشجعهم..الوحده مخيفه جدا و تقاسم الحياة مع شخص بيفرق في حاجات كتير..شخص يقدر يقسم معانا الحزن و الالم و الفشل و الوقت الصعب..و في نفس الوقت حد يفرح معنا وقت النجاح و لحظات وصول للطموح..ماحدش بيحب يبقى لوحده.

ربنا خلق من كل حاجه ازواج..و خلق أدم و حوا..الاتنين محتاجين بعض..أدم “يسكن إلى حوا ” و حوا مهما كانت قويه محتاجه أمان أدم..لذلك اتخلقت من ضلعه..و أحنا بنستمد قوتنا من بعض في العالم ده..لذلك “strong independent و أخترت راجل صح” ممكن تكون جمله أكثر واقعية من “strong independent و مش محتاجه راجل”

Comments