كلاسيكو العرب يشع شعاعاً أبيض

قمة , ديربى , كلاسيكو ..

مباراة دايما ليها مذاق و طابع خاص عند كل واحد فينا , سواء بزملكاويته أو بأهلاويته .. فاز من فاز وخسر من خسر و حبك لفرقتك عمره ما بيقل , بالعكس ده دايما فى زيادة ..

سوبر 3 بيتضاف لخزينة نادى الزمالك , بعد الفوز على الأهلى بضربات الجزاء الترجيحية , بعد تعادل سلبى 0/0

الحقيقة الماتش مكانش فيه الكورة اللى كنا مستنينها , وده لكذا سبب , أولهم الإرهاق اللى ظهر على لعيبة المنتخب (أحمد فتحى – عبد الله السعيد – أحمد حجازى – طارق حامد – على جبر )  اللى لسة راجعة من الجابون مكملوش 5 ايام ..

تانى حاجة ان ده أول ماتش رسمى للفرقتين من أكتر من شهر من أخر ماتش الفرقتين لعبوه , و هو ماتش القمة للدور الأول و اللى كان فى أواخر شهر ديسمبر و انتهى 2/0 للأهلى ..

و لكن دايماً الإثارة موجودة و دايماً التنافس موجود بين القطبين ..

أول سوبر للزمالك يفوز بيه من سنة 2002 , و أول سوبر يفوز فيه الزمالك على الأهلى , حيث ان تاريخ مواجهاتهم فى بطولة السوبر 4 مرات فاز بيهم الأهلى كلهم , و لكن جنش كان سر فك العقدة ..

ضربات الجزاء انتهت , 3/1 للزمالك بعد تصدى جنش لركلتين من مؤمن زكريا و صالح جمعة و كرة تانية فى السما من حسام غالى و سجل حجازى الكرة الوحيدة  ..

مقابل 3 تسديدات نجحة للعيبة الزمالك باقدام باسم مرسى , أسامة إبراهيم و أحمد رفعت ..

سميها زى ما انت عايز تسميها , و لكن افتكر حاجة واحدة بس و هى ان الكورة دائماً و ابداً هى للجماهير و بس .. بعيداً عن نتيجة الماتش و بعيداً عن مين كسب و مين خسر..

 كرنفال احتفالى بدولة الإمارات الشقيقة ,  شفتوا جمال أحلى من لونين بيغطوا مدرجات استاد هما الابيض و الاحمر .. شكراً لكل الجماهير اللى حضرت , مبروك للزمالك و هاردلك للاهلى ..

Comments