مولانا

كنت مقرره اني هاكتب عن فيلم تاني خالص… بس في الحقيقة بعد ما شفت الضجه اللي حصلت علي فيلم مولانا و انه عن روايه لإبراهيم عيسي و من اخراج مجدي احمد علي, قررت اني لازم ادخله عشان افهم البلد مقلوبه كده ليه… و فهمت.

الفيلم بيورينا الصراع بين الدين و السلطه و الفلوس و الضمير…حكايه يمكن اتعملت كتير بس طريقة طرحها مختلفه, الشيخ حاتم (عمرو سعد) هو نموذج للدين اللي عصرنا ده محتاجه, رغم التنقاضات اللي بنشوفها في افعاله و ده له مبرراته, الا انه الشيخ اللي المفروض يقول الخطب في الجوامع والفتاوي في التليفزيون…جيلنا بيفكر و محتاج العقل و المنطق في اي حاجه بتتقاله و مفيش احسن من الشيخ حاتم في ده.

علي الجانب الثاني بقي بنشوف الجزء الأكبر من المشايخ اللي اي سؤال عندهم رده “دي حاجه في علم الغيب” و “ما انتوا جيل عايز يفتي في كل حاجه حتي الدين” بنشوف الناس اللي بتسمع التواشيح الدينيه كأنها أغاني بيسقفوا عليها, سياسيين شايفين إن الفتاوي الدينيه هي حل عشان يحللوا اي حاجه او يحرموها.

حسين او بطررررررس(احمد مجدي)(اللي دخل الفيلم هيفهم طولت في الاسم ليه) لعب الدور صح, كل حاجه فيه لايقه علي الشخصية, لبسه و طريقته اللي فيها برود شويه, حتي شعره, كنت بستني المشاهد اللي بينه و بين الشيخ حاتم, بس بصراحه المبرر للتحول اللي حصله في اخر الفيلم مش مقنع علي الاقل بالنسبالي.

شكرا يا عمرو سعد عشان ليك مشاهد من جمالها كنت بفتكر أداء أكتر ممثل مصر كلها كانت بتحبه… و اللي هيركز هيفهم أنا بتكلم عن مين..

ابن رئيس الجمهوريه (علاء حسني) من احسن الممثلين اللي موجودين دلوقتي, تمثليه شدني من مسلسل (بدون ذكر أسماء), اما بالنسبه لزوجة الشيخ حاتم (دره) و نشوي (ريهام حجاج) يمكن كان اداء كويس الي حد ما بالنسبة لأدوارهم اللي قبل كده, بس معتقدش كانوا أحسن إختيار للأدوار.

الإخراج و التصوير و المونتاج… الثلاثه كانوا بيعزفوا مع بعض حرفياً… يعني مثلا الكاميرا حركتها كانت لايقه علي الحاله اللي بين الشخصيات في المشاهد, حركه بسيطه و ثابته في المشاهد اللي فيها هدوء أو حركه كتير و موتره للمشاهد اللي فيها انفعال, كتير حسيت اني كنت واقفه معاهم مش مجرد قاعده و بتفرج, و المونتاج كان حلو جدا في مشاهد الفلاش باك.

مولانا, فيلم جرئ و مهم و محتاج تركيز و عقل كده و انت بتتفرج عليه, فيلم بيقول السينما المصريه اهي, لسه بتطرح تساؤلات تشغل العقل, و في ابداع في طرحها, اعمل حسابك و انت نازل السينما عشان انا واثقه انك هتقطع تذكره للحفله اللي بعدها.

57c2de8711cf8423228_0

 

Comments