يومك في الشغل مبيخلصش من غير مثل شعبي

الأمثال الشعبية بتمثل جزء كبير من حياتنا اليومية من غير ما ناخد بالنا، و عشان كدة جمعنالك ١٠ امثال بتحتاجهم يومياَ في شغلك

١-“دارى على شمعتك تقيد”

ديه نظرية بيتبعها معظم زمايلك فى الشغل و بيشتغلوا من تحت لتحت

٢-“يا خبر انهاردة بفلوس بكرة يبقى ببلاش”

لما تسمع انت و زميلك فى الشغل انه حصل حركة ترقية و يبقى عندك فضول تعرف مين اللى هيترقى

٣-“يا داخل بين البصلة و قشرتها ما ينوبك الا ريحتها”

لما تحب تدخل و تفهم العلاقة بين السكرتيرة و مديرك و تنتهى ان مديرك يخصملك يومين

maxresdefault

٤-“ان غاب القط العب يا فار”

لما المدير يمشى بدرى و تقلبها كبارية انت و زمايلك

٥-“طلع مايه من تحت تبن”

لما زميلك اللى كنت فاكره مبيفهمش حاجة يطلع احسن منك و يترقى قبلك

٦-“جحا اولى بلحم توره”

لما مديرك يرقى جوز بنته و هو مبقالوش شهر متعيين

٧-“اللى يتلسع من الشربة ينفخ فى الزبادى”

لما زميلك فى الشغل يضرب فيك اسفين عند مديرك و تبدأ تأخذ حذرك

٨-“لو ليك حاجة عند الكلب قوله يا سيدي”

لما تفضل تمدح فى مديرك عشان يوافقلك على الاجازة

٩-“احنا دفنينه سوا”

لما زميلك فى الشغل يفرد نفسه عليك قدام المدير عشان ياخد عليك بونت

١٠-“ديل الكلب عمره ما يتعدل”

ديه بتقولها لزميلك لما يفضل ليل نهار يتمحلس للمدير

الخلاصة ان المثل الشعبى بيلخص كلام كتير عايزين نقوله فى جملة واحدة، حاجة كدة عاملة زى الشفرات او كلمة السر ميعرفهاش وميفهمهاش غير ابن البلد اللى على حق.

Comments