خمس علامات تدل إنه Husband Material

A man in a tuxedo fixing his bowtie

بقلم: ياسمين رجب

ورقة وقلم وإكتبي معايا يا ست الكل.

واحد: لازم يكون باله طوووويل.

مش هنكدب على نفسنا إحنا بنحتاج نتسأل خمستاشر مرة “مالِك؟” عشان نحس اللي قدامنا فعلاً مهتم يعرف مش تأدية واجب ومش مجرد فضول. (معلومة للشباب إحنا بنعمل كدة حتى مع صحابنا البنات. Nothing personal فإنتِ محتاجة حد فيه خُلق وصحة للإلحاح. ده غير إن حكاويكي وخناقاتِك مع صاحبتِك اللي غالباً مش بيبقى ليها سبب محدد هتحتاج حد صبور يسمع ويحلل ويديكي إحتمالات وتفسيرات وفييدباك.

إتنين: Support System على رجلين.

أغلب الوقت إحنا –كبنات- بنحتاج حد يدينا compliments ويفكرنا إننا نستاهل نتحب وإننا ممكن نبقى حاجة كويسة. لازم يكون عايزِك ناجحة وماعندوش مشكلة نفسية مع نجاحِك ده. ده محتاج مجهود منه ومنِك الحقيقة، يعني ماتبقيش بتنجحي وبتعايريه بفشله أو إنه مش في نفس مستوى نجاحِك وبعدين تقولي مش عايزني ناجحة، شوية logic في التعامل. أهم حاجة يكون هو مؤمن بإنِك موهوبة في الحاجة اللي إنتِ بتحبيها وعنده إستعداد دائم إنه يبقى إبراهيم الفقي لما تبدأي تـgive up عن حاجة إنتِ كويسة فيها.

تلاتة: متعدد المواهب والشخصيات.

في رأيي الناس اللي بتقول إننا متطلبين في شريك حياتنا دول مفتريين. الفكرة كلها إننا في نفسنا فينا كذا شخصية فبنحتاج حد يتماشى مع كل شخصية. وبكل أمانة مافيش علاقة بتنجح لو شريك جياة البنت مش عارف وفاهم كل شخصياتها أو جوانب شخصيتها. بتبقى حاجة “جيت ألم البنطلون الجاكيتة ضربت” خالص. فأحياناً بنحتاج يبقى دمه خفيف بس مش تافه، غيور بس مش يخنق، صايع بس مايبصش برة، رومانسي بس مش ملزق. وفي رأيي it goes both ways بس الستات واضحين أكتر.

أربعة: مش ابن أمه ورأيه من دماغه.

…..لأ دي واضحة يعني.

خمسة: ماعندوش مشكلة يعتذر.

دي من الحاجات المهمة جداً في الراجل لإن اللي مابيعترفش بالغلط مابيشوفش إنه بيغلط وبالتالي هو صح والباقي غلط ودي مصيبة يافندم. اللي ماعندوش مشكلة يعتذر ده مش بيشوف الرجولة صوت عالي ونشفان دماغ وبس. لذلك اللي بيعتذر لما يغلط فاهم يعني إيه راجل فمش هيغلبنا معاه في شرح وتوضيح بديهيات ومباديء التعامل مع النساء.

Comments