ملخص الأسبوع في الساحرة المستديرة

unnamedبعد ما كل منافسيه اتعثروا , قدر الاهلى ينفرد بصدارة الدورى المصرى برصيد 32 نقطة بعد الثلاثية الجميلة اللى فاز بيها على الشرقية باقدام وليد سليمان و احمد فتحى و مؤمن زكريا و الاجوان كلها كانت روعة , مع تعثر المقاصة اقرب نادى للاهلى فى الجدول بعد التعادل مع زعيم الثغر الاتحاد 1/1 و قدر انه يوصل للنقطة 28 و باقى له لسة ماتش مؤجل مع الزمالك بفرق 4 نقط عن الاهلى , فى نتيجة مخيبة لايهاب جلال قبل الماتش اللى جاى المهم مع الاهلى فى قمة الاسبوع ال 13 يوم 4/12 الساعة 8.

و قدر دجلة بقيادة ميدو يفقد الزمالك نقطتين مهمين فى مهمة الصراع على اللقب بعد التعادل معاه بنتيجة 1/1 بعد مباراة مثيرة , و بعد الماتش على طول اقال مرتضى محمد صلاح من منصب المدير الفنى و عين بدل منه محمد حلمى ليكون المدرب رقم 13 مع مرتضى منصور من 2014 , ,13 مدرب فى سنتين بس , و بعد التعادل ده الزمالك بقى فى المركز السادس برصيد 18 نقطة و متبقى له 4 ماتشات مؤجلة مع المقاصة و الشرقية و طلائع الجيش و الانتاج الحربى.



England Cup

و نطير من مصر لاوروبا و اول وجهة لينا هى انجلترا , و بطولة كاس رابطة الاندية الانجليزية , و مع اول مفاجأة و هى خسارة فريق ارسنال على ارضه و وسط جماهيره بنتيجة 2/0 من ساوثهامبتون و بمشاركة لاعبنا المصرى محمد الننى و اللى للاسف اتصاب و اتبدل فى الدقيقة 43 و ان شاء الله تكون اصابة خفيفة.

و المفاجأة التانية هى خروج نيوكاسل يونايتد الفريق القوى , هو اينعم بيلعب فى دورى الدرجة التانية بس متصدر الدورى و بيسعى بقوة للعودة للدرجة الاولى تحت قيادة المخضرم رافا بينيتز , و خسر من هال سيتى بضربات الجزاء بنتيجة 3/1 لهال سيتى , و شارك فى الماتش لاعبنا المصرى احمد المحمدى و خرج فى الدقيقة 79 بعد اداء جيد.

و فى الماتشين التانيين اولا قدر ليفربول بخبرته الكبيرة انه يفوز على الفريق المجتهد ليدز يونايتد بنتيجة 2/0 , و اللى خلانا نقول ان ليدز مجتهد ان برغم ان ليفربول كان تقريبا بيلعب الماتش بنص التشكيلة الاساسية الا انه واجه صعوبات كبيرة و سجل الجون الاول متأخر فى الدقيقة 77 و بعدها اضاف اللاعب بنجامين وودبيرن صاحب ال 17 سنة و اصغر لاعب فى تاريخ ليفربول يجيب جون مع الفريق الاول  والجون ده كان فى الدقيقة 81.

و فى الماتش التانى قدر اليونايتد متخصص الكاس , انه يفوز بنتيجة كبيرة و اداء كويس جدا بنتيجة 4/1 مع خروج اليونايتد باكتر من استفادة من الماتش بتألق ابرا و اللى سجل هدفين و تألق مارسيال و اللى برضه سجل هدفين مع التألق الكبير لمختاريان اللى قدم اداء متميز , و الاستفادة الاخيرة هى مشاركة شفاينشتايجر بعد مدة كبيرة مشاركش فيها اللاعب و اللى نزل احتياطى فى الدقيقة 86.

و اقيمت القرعة بعد انتهاء ماتشات النهاردة و فى انتظار نهائى مثير بين كلوب و مورينهيو لو كل مدرب فيهم قدر يتخطى منافسه فى نص النهائى , و اللى وقع هال ( المحمدى ) مع اليونايتد و ماتش الذهاب حيكون على ملعب اولد ترافورد يوم 10 يناير و العودة يوم 24 نفس الشهر فى ملعب كى سى ستاديوم.

و فى المبارة التانية فحيقابل ليفربول ساوثهامبتون , و مباراة الذهاب حتكون على ملعب الساوث ( سانت مارى ) يوم 10 يناير و العودة فى الانفيلد يوم 24  نفس الشهر.



%d8%b4%d8%b9%d8%a7%d8%b1_%d9%83%d8%a3%d8%b3_%d9%85%d9%84%d9%83_%d8%a5%d8%b3%d8%a8%d8%a7%d9%86%d9%8a%d8%a7

و من انجلترا لاسبانيا و الى كاس الملك ونبتدى بالملكى ريال مدريد و اللى بيعيش فترة ازدهار بعد ما قدر انه ميخسرش للماتش رقم 32 على التوالى مع زيدان و اللى متبقيله 4 ماتشات بس لكسر الرقم التاريخى المسجل ب 36 ماتش , و قدر الريال يفوز بنتيجة 6/1 , و ده كان ماتش العودة و كان ماتش الذهاب خلص 7/1 للريال و قدر زيدان انه يطمن على كاسيميرو و اللى شارك فى الماتش بعد غياب شهرين ونص و برضه من الحاجات الحلوة فى الماتش هى اول مشاركة رسمية لانزو زيدان ابن زيدان فى اول ماتش رسمى ليه مع النادى و قدر انه يجيب الجون الرابع , و شهد الماتش برضه تألق المهاجم مايورال و اللى سجل هاتريك فى الماتش.

و فى المعسكر الكتالونى و فى مفاجأة من العيار الثقيل بعد تعثره فى الدورى و تعادله اخر ماتشين , تعادل جديد للفريق الكتالونى فى الكاس و قدام فريق من الدرجة التالتة ايركوليس و اتعادل الفرقتين 1/1 , تعادل كان مخيب جدا لانريكى اللى بيقابل سوء مستوى كبير للفريق و دخوله على ماتش مهم جدا يوم السبت الساعة 5 و ربع قدام الغريم التقليدى ريال مدريد على ملعب الكامب نو

و بعد خسارتهم للديربى بثلاثية , ابناء سميونى بيرجعوا اقوي بعد الفوز فى الدورى على اوساسونا بثلاثية و الفوز فى مبارة الكاس خارج ارضه بسداسسية نظيفة على فريق غيخويلو فى مباراة الذهاب.


و بكدة انتهت جولتنا فى ملاعب العالم .. و دي بعض الاخبار المهمة:

اول خبر و اكيد خبر حزين على كل جماهير الكرة المصرية و هى اصابة محمد صلاح لاعبنا المصرى و لاعب نادى روما النهاردة فى التدريبات و عليها مقدرش صلاح يكمل التمرين , و حيعمل بعض الفحوصات النهاردة و ان شاء الله نتطمن عليه خصوصا ان مصر داخلة على بطولة كاس امم افريقيا اللى غايبة عننا من 7 سنين مشاركناش فيها.

قرر الفيفا استخدام الحكم المساعد بالفيديو بداية من كاس العالم 2018 و اللى حيتلعب فى روسيا و ان شاء الله حننزلكوا كافة التفاصيل عن النظام ده.

و اخيرا عن اهم ماتشين و اللى العالم كله مستنيهم بداية من اسبانيا و ماتش بيتفرج عليه عن اخر احصائية تقريبا 1.6 مليار بنى ادم حول العالم وهى مباراة الكلاسيكو بين برشلونة و ريال مدريد على ملعب الكامب نو يوم السبت 3/12/2016 الساعة 5.15.

و عن قمة الدورى الانجليزى بين المتصدر تشيلسى برصيد 31 نقطة تحت قيادة كونتى امام تحدى مهم جدا فاصل فى مسيرة البلوز فى الدورى بعد 7 انتصارات متتالية قدام مانشستر سيتى التالت برصيد 30 نقطة و فرق نقطة واحدة بس بقيادة افضل مدرب فى العالم حاليا جوارديولا و الماتش حيكون فى ملعب الاتحاد يوم السبت 3/12/2016 الساعة 2:30.

Comments